‘धुर्मुसपछि माग्ने बुढा’ पनि श्रीमती सहित लागे समाजसेवाको बाटो
चर्चित हास्य ब्यांग्य जोडी धुर्मुस–सुन्तली (सिताराम कट्टेल, कुञ्जना घिमिरे) ले समाज सेवा र राष्ट्र निर्माणमा स्यावासी पाइरहेका बेला ‘माग्ने बुढा’को जोडी पनि समाजसेवाको बाटो हिँड्न थालेको छ ।
उनका सहकर्मी मित्र धुर्मुसले समाजसेवाको ठूलै पहाड उक्लिरहेका बेला माग्नेले पनि आफ्नो तर्फबाट केही पहलहरु सुरु गरेका छन् ।
केदार प्रसाद घिमिरे ‘माग्ने बुढा’ र पत्नी सितादेवी तिमल्सिनाले एक विद्यालयलाई नगद सहयोग गरेसँगै अब यो हौसला उनलाई आउँन थालेको छ ।
कर्णालीमा नेपालकै नमुना निःशुल्क आवासिय बिद्यालय संचालनको लागि घिमिरे दम्पत्तीले ७५ हजार सहयोग गरेका हुन् ।
कालीकोटस्थित राशकोट नगरपालिकाको सिफ्टी बिशालीमा निःशुल्क आवासिय बिद्यालय संचालनको सहयोगार्थ घिमिरे दम्पत्तीले कर्णाली फाउन्डेसनका अध्यक्ष तिलक प्रसाद उपाध्यायलाई उक्त रकम हस्तान्तरण गरेको बताइएको छ ।
आवासिय बिद्यालयको साथमा अध्ययन तथा अनुसन्धान केन्द्र, धार्मिक पर्यटनको लागि नेपालकै ठुलो शिव मन्दिरको निर्माण, प्राविधिक शिलालय लगायतका अन्य संरचनाहरु पनि सहयोग रकमले निर्माण गरिने फाउन्डेसनका सदस्य लिलाराज बरालले बताए ।
हाँस्य प्रस्तुतीका लागि कर्णाली फाउन्डेसनकै कार्यक्रममा पुगेका केदार र सिताले विद्यालयलाई सहयोग रकम हस्तान्तरण गरेका हुन् । माग्नेले पछिल्लो समय विभिन्न सफल चलचित्रमा काम गरिरहेका बेला उनको पारिश्रीमक ह्वाततै बढेको छ ।
