के हो नेकपाको नाम विवाद ? शक्तिशाली सत्तारुढ दललाई सानो पार्टी निल्नु न ओकल्नु !
देशका दुई ठूला कम्युनिस्ट पार्टी एकीकरण भएर बनेको नेपाल कम्युनिस्ट पार्टी (नेकपा) को नाम विवाद फेरि एकपटक सतहमा आएको छ ।
गत जेठ ३ गते पार्टी एकता घोषणासँगै नेकपा नामको दल दर्ताका लागि निर्वाचन आयोगमा निवेदन पर्यो । आयोगमा सो नामको दल त्यसअघि नै दर्ता भइसकेको थियो । जसको अध्यक्ष हुन्, ऋषि कट्टेल ।
एउटै नाममा दुई वा सो भन्दा बढी दल दर्ता गर्न नमिल्ने कानूनी प्रवधानका कारण निर्वाचन आयोग पुगेको सत्तारुढ दलको टोलीले नेपाल कम्युनिस्ट पार्टीनामको दल दर्ताका लागि निवेदन दियो ।
मुनि अन्डरलाइन राखिए पनि नाम एउटै थियो । यसबीचमा सामाजिक सञ्जालमा अण्डरलाइन नेकपा भनेर खिस्सी गर्ने क्रमसमेत शुरू भइसकेको थियो ।
अन्ततस् त्यसमा केही परिमार्जन गरेर ुनेपाल कम्युनिस्ट पार्टी (नेकपा) नामबाट आयोगमा दल दर्ता भयो । त्यसपछि साम्य भएको ठानिएको नेकपाको नाम विवाद फेरि एकपटक सतहमा आएको छ ।
पुरानो नेकपाका अध्यक्ष ऋषि कट्टेलले एउटै नाममा अर्को दल दर्ता गर्ने आयोगको निर्णयविरुद्ध सर्वोच्च अदालत जाने चेतावनी दिएका छन् । बुधवार आयोगले दुवै दलका नेताहरूलाई बोलाएर यस विषयमा छलफल समेत गरेको थियो । तर छलफल निष्कर्षमा पुग्न सकेन ।
शुक्रवार बैठक बसेर निर्णय सुनाउने तयारी आयोगले गरेको छ । दलको नामका विषयमा निर्णय लिने अधिकार निर्वाचन आयोगलाई छ ।
दुई तिहाइ बहुमतका साथ सरकारको नेतृत्व गरिरहेको दललाई राष्ट्रिय दलको मान्यता समेत नपाएको एउटा सानो दल निल्नु न ओकल्नु बन्न पुगेको छ ।
त्यसो त सत्तारुढ नेकपाका नेताहरू कट्टेललाई त्यति सारो भाउ दिने पक्षमा छैनन् । निर्वाचन आयोगले लिने निर्णय आफूअनुकूल हुनेमा उनीहरू ढुक्क देखिन्छ ।
नेपाल कम्युनिस्ट पार्टीु पछाडि ब्राकेटभित्र (नेकपा) राखेर दल दर्ता गरेको आयोगले यही निर्णयलाई दोहोर्याउने सम्भावना प्रबल रहेको निर्वाचन आयोग स्रोतले जानकारी दियो ।
ऋषि कट्टेलको पार्टीको नाम कागजमा नेपाल कम्युनिस्ट पार्टी मात्र छ । त्यसलाई सहजताका लागि मिडिया र बाहिरी प्रयोजनमा छोटकरी नेकपा नै लेखिए पनि आधिकारिक लिखतमा भने फरक नै देखिन्छ ।
