काँग्रेसभित्रको किचलो कायमै,सभापतिलाई शक्तिशाली बनाउने मस्यौदामा पौडेल र सिटौलाको आपत्ति
नयाँ बन्दै गरेकाे विधानमा सभापतिलाई शक्तिशाली बनाउने गरी परिमार्जन गर्ने संस्थापन पक्षको योजना कमजोर हुँदै गएको छ । विधानको प्रारम्भिक मस्यौदामा नेता रामचन्द्र पौडेल र कृष्ण सिटौला पक्षले आपत्ति जनाएको पछि संस्थापन पक्ष कमजाेर बनेकाे हाे ।
सभापति शेरबहादुर देउवा पक्षको बहुमत रहेको विधान मस्यौदा समितिले सभापतिलाई थप बलियो बनाउने गरी सभापतिबाहेकका सबै ९ पदाधिकारी मनोनीत गर्ने प्रस्ताव गरेको थियो । त्यसमा पौडेल–सिटौला पक्षले असहमति जनाएको छ । मिश्रित प्रणाली अपनाउनुपर्ने उनीहरूको माग छ । जिल्ला तहबाट पनि अधिकांश सुझाब मिश्रित प्रणाली अपनाउनुपर्ने आएपछि संस्थापन पक्ष थप दबाबमा परेको छ ।
सबै पदाधिकारी मनोनीतको व्यवस्था गर्दा सभापति शक्तिशाली र निरंकुश बन्ने पौडेल–सिटौला पक्षको निष्कर्ष छ । प्रस्तावित विधान मस्यौदामा मिश्रित प्रणालीलाई दोस्रो विकल्पका रूपमा राखिएको थियो । पदाधिकारी संख्या बढाउने या नबढाउने विषयमा पनि समितिमा फरक मत छ । अहिले रहेको पदाधिकारी संख्या नै राखेर थप्ने–नथप्ने जिम्मा केन्द्रीय समितिलाई दिने विधान समितिको तयारी छ ।
प्रस्तावित विधानअनुसार केन्द्रीय समितिको संख्या १०३, १२३ वा १३३ मध्ये एक हुँदा पदाधिकारी पनि बढ्ने लगभग निश्चित छ । केही सिनियर नेताले केन्द्रीय समितिको अधिकार घटेर प्रदेशमा जाने भएपछि केन्द्रीय समितिको आकार बढ्ने विषय स्वाभाविक नभएको बताइरहेका छन् ।
