चर्कियो विवाद : प्रस्ताव नआएपनि सांसदले प्रदेशको नाम र राजधानीबाहेक बोल्नै छाडे !
प्रदेश नम्बर १ को प्रदेश सभामा प्रदेशको नाम र राजधानीको विषय अनौपचारिक रूपमा प्रवेश गरेको छ । प्रदेश सभामा सरकारले प्रस्ताव पेश गर्न नै बाँकी रहेपनि सांसद्हरूले यस विषयमा धारणा राख्न थालेका हुन् ।
प्रदेश सभामा प्रवेश नै नगरेको विषय एकाएक अघिल्लो बैठकमा उठेपछि शून्य समयमा बोल्ने अधिकांश सांसदहरूले प्रदेशको स्थायी राजधानी, नामका विषयमा धारणा राख्न थालेका छन् ।
आइतवार बसेको प्रदेश सभा बैठकमा बोल्ने ३ सांसदले स्थायी राजधानी र नामको विषयसँगै एकै स्थानमा मन्त्रालय र प्रदेश सभा राख्न सुझाव दिएका छन् ।
मुख्यमन्त्री शेरधन राईले मन्त्रालय विराटनगर राख्ने र प्रदेश सभा भवन विराटनगर बाहिर लाने अभिव्यक्ति दिएपछि सांसदहरूले प्रदेशका सबै संयन्त्र केन्द्रीकृत हुनुपर्ने धारणा राखेका हुन् ।
शून्य समयमा बोल्दै सुनसरीका सांसद तहिर मियाले १ नम्बर प्रदेशको राजधानी र नाम तोक्ने विषयले जनतालाई दु:ख दिन नहुने भन्दै प्रदेश सभा र मन्त्रालयहरू एउटै शहरमा हुनुपर्ने धारणा राखे ।
उनले अहिलेको अवस्थामा प्रदेशको राजधानी एकातिर राखेर अर्कोतिर मन्त्रालय अनि अर्कोतिर संसद भवन राख्दा जनतालाई दु;ख हुने बताए ।
सांसद् शान्ता पौडेलले राजधानीको विषय फरक-फरक स्थानमा राख्न नहुने तर्क गर्दै आमनागरिकको उपभोग्य अधिकारका विषयमा पनि प्रदेश सरकारले चासो दिनुपर्ने बताइन् ।
उनले खुलेआम उपभोक्ताहरू ठगिनुपरेको भन्दै प्रदेश सरकारको ध्यानाकर्षण समेत गराइन् । बजारमा कम तौल भएका ढकतराजु प्रयोग भइरहेको टुलुटुलु हेरेर बस्न नहुने उनको भनाइ छ ।
सुरक्षाको माग
ताप्लेजुङका सांसद् बलबहादुर साम्सोहाङले एक नम्बर प्रदेशको स्थायी राजधानी र नामको विषय सदनमा प्रवेश नै नभएको अवस्थामा बजारमा कुरा चर्किएको बताए ।
सदनमा प्रदेशको नाम र राजधानीको बारेमा छलफल गर्दा कतिपय कुरा जनताको भावना र विचारका रूपमा आएकाले त्यसको पनि सम्मान गर्नुपर्ने बताए ।
प्रदेश राजधानी र नाम यो या त्यो भएन भने ज्यान खतरामा छ भनेर सांसद्हरूले नै कुरा उठाएको तर्फ इंगित गर्दै उनले सरकारको ध्यानाकर्षण गराए ।
‘कसैले ओल्लो कसैले पल्लो गाउँ माग्न पाउँछ,’ उनले भने, ‘तर यसै विषयलाई लिएर सांसदहरूलाई असुरक्षित गराइएको छ । म सरकारको ध्यानाकर्षण गरउँछु ।’
संसद्को अघिल्लो बैठकमा संघीय लोकतान्त्रिक राष्ट्रिय मञ्जकी सांसद् विष्णु तुम्बाहाम्फेले प्रदेशको नाम लिम्बुवान नभए जस्तोसुकै कदम चाल्न सक्ने भन्दै धम्कीपूर्ण अभिव्यक्ति दिएकी थिइन् ।
