सेनाको कार्यक्रममा पत्रकारलाई निषेध
नेपाली सेनाको आर्थिक कारोबारसम्बन्धी विशेष छलफलमा सञ्चारकर्मीहरुलाई प्रवेश रोक लगाइएको छ ।
सेनाको आर्थिक गतिविधि बाहिरिन जनाउँदै संसद्को राज्य व्यवस्था समितिले बैठकमा पत्रकारलाई प्रवेश गर्न नदिएको हो । मंगलबार बसेको राज्य व्यवस्था तथा सुशासन समितिको बैठकमा पत्रकारलाई रोक लगाएको हो । सोमबार गृहसम्बन्धीको छलफलमा पनि सञ्चारकर्मीलाई रोक लगाएको थियो ।
बैठकमा रक्षा मन्त्रालय र सेनाका आर्थिक गतिविधि र प्रशासनिक कामबारे बुझ्नका लागि समितिले कार्यवाहक प्रधानमन्त्री एवं रक्षामन्त्री इश्वर पोखरेल, रक्षा सचिव बिष्णु लम्साल, प्रधान सेनापति पूर्णचन्द्र थापालगायत सेनाका उच्च पदस्थ अधिकारीहरुलाई बोलाएको छ ।
समाचार संकलन गर्न गएका सञ्चारकर्मीहरुलाई बैठक शुरु हुना साथ राज्य व्यवस्था तथा सुशासन सभापति शशी श्रेष्ठले बाहिर गएर सहयोग गरिदिन आग्रह गरिन् । उनले भनिन्, ‘संवेदनशील विषयमा छलफल भइरहेकाले तपाईहरु बाहिर गएर सहयोग गरिदिनुन् ।’
विगतमा रक्षा र गृह सम्बन्धी कुनै पनि छलफलमा सञ्चारकर्मीलाई रोक लगाएको थिएन । यसअघि सुडान घोटाला, हातहतियार सम्बन्धी छलफलमा समेत पत्रकारलाई समाचार संकलनमा कुनै रोकावट गरिएको थिएन । नयाँपेजबाट
