गृहमन्त्री हिरो बन्न खोज्दा प्रहरी जिरो बन्दै ?

 

नेपाल प्रहरी यतिबेला सबैको तारो भइरहेको छ । नागरिक र मिडियाबाट त आलोचना भइरहेको छ नै राज्यकै माथिल्लो निकायबाट समेत प्रहरीलाई गाली गर्ने काम भइरहेको छ । प्रधानमन्त्री केपी शर्मा ओली तथा गृहमन्त्री रामबहादुर थापा बादलले समेत निर्मला पन्त बलात्कारपछि हत्या घटनामा आफूहरुलाई गलत ब्रिफिङ गरेर प्रहरीले फसाएको सार्वजनिक रुपमै बताइसकेका छन् ।

 

गत साता राज्यव्यवस्था समितिमा गृहमन्त्री बादलको भनाइले प्रहरी अधिकारीहरु झन् चकित बनेका छन् । निर्मलाका बुवा भारतमा भएको बेलाको मिति राखेर सनाखत मुचुल्कामा औंठाछाप लगाएको र निर्मलाको कपडा प्रहरीले जलाएको भनेर उनले आलोचना गरे । निर्मलाको कपडा जलाएको विषय यसअघि नै आइसकेको छ । ल्याबमा पठाउनुपर्ने कपडा जलाएर प्रहरीले प्रमाण नष्ट गरेको थियो ।

 

सनाखत मुचुल्कामा पछि औंठाछाप लगाइएको विषयलाई भने थप उचालेर गृहमन्त्रीले प्रहरीको मनोबल थप खस्काएका छन् । सामान्यतया सनाखत मुचुल्का  शव भेटिएको दिन तयार हुन्छ । सोही दिनको मिति राखिन्छ ।

 

निर्मलाको साइकलको सनाखत गराउन प्रहरीले साउन ११ गते मुचुल्का बनाएको थियो । त्यही दिन निर्मलाकी आमाले मुचुल्कामा औंठाछाप लगाएकी थिइन् ।
त्यो दिन निर्मलाका बुवा यज्ञराज कान्छी श्रीमतीसँग भारतमा गएका थिए । भारतबाट नेपाल आएपछि साइकलको सनाखतमा उनको पनि औंठाछाप लगाइयो । त्यो साउन १३ गतेको घटना थियो ।

 

त्यही दिन प्रहरीले मृतकको नाम परिवर्तन गरी कोड नाम राखेको थियो । बलात्कार मुद्दामा पीडितको नाम नराखी कोड नाम राखिन्छ । त्यसका लागि पनि पीडितको परिवारको औंठाछाप चाहिन्छ । त्यसमा पनि यज्ञराजको औंठाछाप लगाइएको थियो । दुवै कागजमा एकैपटक उनको औंठाछाप लगाइएको थियो ।

 

कहिलेकाहीँ पुरानो मिति राखेर गृहले केही निर्णयहरु गर्दछ । शव भेटिएकै दिनको मुचुल्का भएको त्यही दिनको मिति हुनु स्वभाविक थियो । तर, त्यो विषयलाई गृहमन्त्रीले नै प्रहरीले ठूलो गल्ती गरेको जसो गरी सार्वजनिक गरिदिए । प्रहरी थप विवादमा फस्यो ।

 

स्रोतका अनुसार एआइजी धिरु बस्नेत नेतृत्वको छानबिन समितिको ब्रिफिङका आधारमा गृहमन्त्रीले त्यस्तो बताएका थिए । गृहमन्त्रीको भाषणपछि त्यस विषयमा प्रहरीले गलत ब्रिफिङको समीक्षा गरेको थियो ।

 

गृहमन्त्रीको यो भाषणले के देखाउँछ भने गृहमन्त्री घटनाको सबै दोष प्रहरीमाथि थोपरेर आफू त्यसमा जोगिन चाहन्छन् । पन्तका अभियुक्त पत्ता नलाग्नुमा आफ्नो कुनै गल्ती नभई प्रहरीको मात्र गल्ती भएको देखाउन चाहन्छन् । प्रहरीलाइ जिरो बनाएर आफू भने हिरो बन्न चाहन्छन् ।

 

त्यसो त गृहमन्त्री मात्र होइन प्रहरी महानिरीक्षकमा पनि यो समस्या देखिएको छ । कञ्चनपुर पुगेर उनले प्रहरीकै कारण प्रहरी बदनाम भएको बताए । तर, नालायक नेतृत्व जिल्लामा हुँदा पनि त्यसबारे पहिले उनलाई जानकारी थिएन ।

 

घटनाको वास्तविकता पत्ता लगाउन गृहमन्त्रालयले नै सहयोगी भूमिका खेल्न नसकेपछि अनुसन्धानमा आबद्ध प्रहरी अधिकारीहरुसमेत निराश छन् ।

 

अभियुक्त दिलिप नै ?
उता अनुसन्धानमा लापरबाही गरेको आरोपमा निलम्बनमा परेका प्रहरी अधिकारीले भने निर्मला पन्तलाई दिलीपसिंह बिष्टले नै बलात्कापछि हत्या गरेको दाबी गरेका छन् । आफूहरुको अनुसन्धानमा त्रुटि नभएको उनीहरुको दाबी छ ।

 

सो टिमले बिष्टलाई अभियुक्तका रुपमा सार्वजनिक गरेको थियो । तर डीएनए नमिलेपछि उनी छुटेका थिए । डीएनएनको नमूना परीक्षणमा नै त्रुटी भएको हुनसक्ने उनीहरुको आशंका छ । बिष्टले बताएको घटनास्थलाको विवरण र घटनास्थलको अवस्था ठ्याक्कै मिलेको उनीहरुको भनाइ छ ।

 

त्यसबाहेक स्थानीयले पनि दिलिपलाई त्यो बाटो हिडेको देखेको बताएका छन् ।
तर, दिलिप नक्कली अभियुक्त भन्दै आन्दोलन चर्किएको थियो । नागरिक दबाबकै भरमा उनलाई छाडिएको ती अनुसन्धान अधिकृतको दाबी छ ।

 

एसपी डिल्लीराज बिष्टसहित, डीएसपीहरु अंगुर जिसी र ज्ञानबहादुर सेटी, इन्सपेक्टरहरु जगदिश भट्ट र एकेन्द्र खड्का तथा असई रामसिंह धामी सो प्रकरणमा निलम्बनमा परेका थिए । उनीहरुले छानबिन समितिलाई दिएको विवरणमा दिलिप नै अभियुक्त भएको दाबी गरेका छन् । दृष्टिबाट