थापाथली अस्पतालका लागि कुपण्डोलमा बन्यो २८ करोडको भवन, टेस्ट्युब बेबी सेवा सञ्चालनमा आउने
परोपकार प्रसूति तथा स्त्रीरोग अस्पतालका लागि ललितपुरको कुपण्डोलमा नयाँ भवन तयार भएको छ ।
अस्पतालले टेस्ट्युब बेबी सेवा सञ्चालनका लागि तीन वर्षअघि कुपण्डोलमा भवन निर्माण गर्न थालेको थियो । २८ करोड बजेटमा निर्माण भएको भवनको निर्माण कार्य लगभग सम्पन्न भइसकेको छ ।
भवन हस्तान्तरणको प्रक्रियामा रहेको अस्पतालका निर्देशक जागेश्वर गौतमले बताए । नयाँ भवनबाट टेस्ट्युब बेबी सेवा सञ्चालन गर्ने प्रसूति गृहको तयारी छ ।
‘हामीले टेस्ट्युब बेबी सेवा सञ्चालनका लागि कुपण्डोलमा २८ करोडको लगानीमा नयाँ भवन बनाएका छौं । भवन निर्माण भइसकेको छ, तर ह्यान्डओभर हुन बाँकी छ,’ डा. गौतमले लोकान्तरसँग भने ।
सो भवनमा टेस्ट्युब बेबी सेवाका अलावा नर्सिङको पढाइ पनि हुने डा. गौतमले जानकारी दिए । यसअघि अस्पतालले थापाथलीमा रहेको अस्पतालबाट सो सेवा दिँदै आएको छ ।
प्रसूति गृहले भूकम्पबाट क्षती भएको अस्पतालको ठाउँमा नयाँ भवन बनाइरहेको छ । जाप्निज सहयोग नियोग (जाईका)को सहयोगमा १ अर्ब २३ करोडको लागतमा निर्माण भइरहेको उक्त भवनमा १ सय ६६ शय्या हुनेछ ।
सात महिनाअघि निर्माण शुरू भएको उक्त भवन फ्रेबुअरी महिनामा निर्माण सकिने डा. गौतमले बताए ।
ती भवनबाट सेवा सञ्चालनमा आएपछि अस्पतालको सेवामा गुणस्तर बढ्ने उनको अपेक्षा छ ।
