निर्मला हत्या प्रकरण : प्रमाण ‘लगभग नष्ट’ भइसकेकाले थरी-थरी कुरा, ‘घरी सेना, घरी प्रहरी’

हाम्रो इकोनोमि

 

निर्मला हत्या प्रकरणको अनुसन्धानमा जटिलता माथि जटिलता थपिएको छ । निर्मलाको खोजीबाट सुरु भएको प्रहरी लापर्वाही सेनाका मान्छेलाई केरकार गर्दासम्म जारी छ । हावा नचली पात हल्दिैन भन्ने नेपालीमा एउटा भनाई छ । तर, त्यसैलाई केहीले रुखको फेदमा बसेर पनि कहिले काँही पात हल्लाउन सकिन्छ भनी तर्क गर्छन् ।

 

तर, निर्मला हत्याका सन्दर्भमा अनेक संशय रहेका कारण फेदमा बसेर पात हल्लाउनेले सेनाका मान्छेलाई केही समयका लागि नियन्त्रणमा लिइएको विषय बाहिर चुहाएको होलान् भन्ने कुरा मान्न सकिँदैन ।

 

अनुसन्धानमा खटिएको प्रहरी, सरकारले बनाएको उच्चस्तरीय छानविन समितिले नै घटनाक्रमबारे यही नै हो भन्न सकेन, दुई थरी कुरा ल्याइदियो । गृहमन्त्रीले प्रतिनिधिसभामै निर्मला हत्याबारे बोल्दै ति बलात्कारीहरु, ति हत्याराहरु कानूनको दायरामा आउनेमा विश्वस्त छौँ, भनि प्रतिवेदनमा लेखिएको बताएसँगै निर्मला हत्यामा समूह नै छ भन्ने प्रष्ट संकेत देखिन्छ ।

 

तर, अहिलेपनि दुई थरी कुरा आइरहेका छन् । एक जना अधिकारकर्मीका अनुसार निर्मला बलात्कार र हत्याबारेका प्रमाण लगभग नष्ट भइसकेकाले धेरै थरी कुरा आएका हुन् । एकथरीले एक हप्ताअघि प्रहरीले सेनाका मान्छेलाई नियन्त्रणमा लिएको भन्छ । तर, अनुसन्धानमा संलग्नहरुले त्यस्तो घटना जानकारीमै छैन, भन्दछन् । जे भएपनि कुरा खुल्दै जाला ।

 

तर, यो बिचमा एउटा कुरा जानकारीमा आएको छ : घटना अनुसन्धानको पहिलो दायित्व भएको कञ्चनपुर प्रहरीको नयाँ र पुराना अनुसन्धान अधिकृतको टोलीले अहिलेसम्म झण्डै साढे २ सय जनालाई सोधपुछ गरेको छ ।

 

तर, प्रहरीले सबै काम अन्धाधुन्ध गरेको छ । प्रहरीले त्यसमा कोही सेनाका मान्छे परे होलान् र ?, भनी गैर जिम्मेवार तर्क गर्छ । घटनाबारे सोध्नेलाई प्रहरीले हिरासतमा गएरै हेरे, भैगो नि ! कसलाई पक्रिएको छ भनेर, समेत भन्यो ।

 

यति धेरैलाइ सोधेको भएपनि उपलब्धी शून्यप्राय छ । चार जनाको डीएनए परीक्षणको रिपोर्ट नगेटिभ आयो भनिएको छ । त्यो भन्दा बाहेक अनुसन्धानका नयाँ प्रगति केही सुनिएका छैनन् । उच्चस्तरीय छानविन समितिको प्रतिवेदन सरकारले थन्काएको छ ।

 

सेनाको मान्छेलाई नियन्त्रणमा लिंदा पत्राचार गर्नु पर्छ ! 
अनुसन्धानका क्रममा सेनाका मान्छेलाई पनि सोध्न सकिने ठाउँ रहन्छ । यस्तै, अन्य घटनाक्रममा सेनाले आफ्नै विभागीय अनुसन्धान गरे पनि हत्या जस्तो जघन्य अपराधमा बाहिर पनि अनुसन्धान हुन्छ ।

 

तर, त्यसका लागि सेनालाई पत्राचार हुनुपर्छ भन्नछन्, कञ्चनपुरका प्रहरी नायब उपरीक्षक कृष्णराज ओझा । कोही मान्छे नियन्त्रणमा लिएको भए हामीलाई जानकारी हुन्छ, उनले भने, ‘त्यसो त म नै कञ्चनपुरको प्रहरी प्रवक्ता हुँ ।’

 

केन्द्रका प्रहरी प्रवक्ता शैलेन्द्र थापा क्षेत्रीले अनुसन्धान गर्दै जाँदा प्रहरीले नियन्त्रणमा लिन सक्छ, तर अहिले कोही पक्राउ परेको भन्ने जानकारी हामीलाई छैन, भने । उनले भने, ‘उच्चस्तरीय छानविन समितिले नजिक व्यारेक रहेकाले छानविन गर्न सकिने कुरा सुझाएको थियो । तर, अनुसन्धानको दायरामै ल्याइएको भए पनि थाहा हुनु पर्ने हो ।’

 

हेडक्वार्टरले दिनमा ३ पल्ट सूचना माग्छ 
प्रहरी प्रधान कार्यालयले कञ्चनपुर प्रहरीसँग निर्मला हत्याको घटनाबारे दिनमा ३ पटक सूचना मागिरहेको छ । तर, अनुसन्धानका क्रममा भएका पछिल्ला केही जानकारी केन्द्रसम्म आएका छैनन् ।

 

महिला एसपी दुर्गा सिंहको टोलीले गरेको अनुसन्धानबारे पनि कुनै कुरा आएको छैन । त्यस्तै, कञ्चनपुरमा गोली चलेलगत्तै केन्द्रीय अनुसन्धान व्यूरोबाट खटिएको ठाकुरप्रसाद ज्ञवाली नेतृत्वको टोली समेत के गरिरहेको छ, भन्ने जानकारी आएको छैन ।

 

निर्मलाको घर नजिकैको अस्थायी प्रहरी पोष्टलाई महत्व नै दिइएको छैन । पहिले तत्कालीन एसपीले अस्थायी प्रहरी पोष्टका इन्चार्ज रामसिंह धामीको सातो लिइहाले । धामी पनि अहिले निलम्बनमा छन् । उनको ठाउँमा अर्का असई खटिएका छन्, तर उनलाई पहिलेको घटनाक्रमबारे केही जानकारी छैन ।

 

जवान बाहेक सबै नयाँ 
जिल्ला प्रहरी कार्यालय कञ्चनपुरमा प्रहरी जवान बाहेक सबै पदमा नयाँ अधिकारीहरु खटिएका छन् । स्रोतले भन्यो–हवल्दारदेखि माथिका पूराना सबै काठमाडौँ पुगेका छन् । सबै नयाँ छन् । एकै पल्ट लगभग १५–१६ जना आएका थिए ।