आक्रमण हुन सक्ने भन्दै गौचन हत्याका योजनाकार बस्नेतलाई नक्खु कारागारबाट सारियो
निर्माण व्यवसायी शरदकुमार गौचन हत्याका मुख्य योजनाकार समिरमान बस्नेतको जेल सरुवा गरिएको छ ।
काठमाडौंस्थित नक्खु कारागारमा रहेका उनलाई सुरक्षाको कारण देखाउँदै गृह प्रशासनले कारागार सरुवा गरेको हो । गौचन हत्याको आरोपमा पुर्पक्षका लागि नख्खु कारागारको थुनामा रहेका बस्नेतलाई सोमबार मुस्ताङ कारागार सरुवा गरिएको हो ।
नख्खु कारागारका प्रमुख जेलर जीवन दुलालले विभागको पत्र आदेश अनुसार बस्नेतलाई मुस्ताङ कारागार सरुवा गरिएको जानकारी दिएका छन् । ‘विभागले पत्र पठाएपछि सरुवा गरिएको हो, बाँकी धेरै जानकारी उतै होला,’ उनले भने ।
निर्माण व्यवसायी महासंघका तत्कालीन अध्यक्ष गौचनको २०७४ असोज २३ गते बिहान नयाँ बानेश्वरको शान्तिनगरमा गोली हानी हत्या गरिएको थियो ।
केन्द्रीय अनुसन्धान ब्युरोले अनुसन्धानमा बस्नेतको संलग्नतासहित कार्बाही अघि बढाएको हो । घटनाका मुख्य आरोपी मनोज पुन मगर प्रहरी मुठभेडमा मारिसकेका छन् । अन्य आधा दर्जन थुनामा छन् ।
