पानी मिसाएको भन्दै पेट्रोल पम्पमा सिलबन्दी
रुपन्देहीको सिमावर्ती क्षेत्र बेलहियामा रहेको पेट्रोल पम्प नवजीवन आयल स्टोरमा संयुक्त बजार अनुगमन टोलीले सिलबन्दी गरेको छ । पेट्रोलमा पानी मिसाएर बेचेको भन्दै अनुगमन टोलीले सिद्धार्थनगर नगरपालिका–१ बेलहियाको उक्त आयल स्टोरमा सिलबन्दी गरेको हो ।
बेलहियादेखि काठमाण्डौमा जाने क्रममा पूर्व वरिष्ठ प्रहरी उपरीक्षक (एसएसपी) समेत रहेका योगेश्वर रोमखामीले बा १३ प १९८५ नम्बरको गाडीमा उक्त पम्पबाट पेट्रोल हालेका थिए ।
पेट्रोल भरेको केही बेरपछि पटकपटक गाडी रोकिएपछि रोमखामीको गुनासो आधारमा अनुगमन टोलीले पम्पमा अनुगमन गर्दा पम्पमा रहेको पेट्रोलमा पानी मिसिएको फेला परेको बताइएको छ ।
‘मैले पेट्रोल हालेको केही समयपछि पटक पटक गाडी रुक्ने गरेपछि वर्कशप लगेर परीक्षण गराउँदा पेट्रोलमा पानी मिसिएको थाहा पाएपछि तत्काल प्रहरीलाई खबर गरे,’ योगेश्वरले बताए । योगेश्वरकै उजुरीको आधारमा उक्त पेट्रोल पम्पमा सिलबन्दी भएको हो ।
टोलीले उक्त आयल स्टोरमा स्थलगत निरीक्षण गर्दा नापतौल कार्यालयबाट नापजाँच समेत नभएको भेटिएको अनुगमन टोलीले बताएको छ । ल्याबबाट रिपोर्ट नआउँदासम्म पेट्रोल पम्पमा सिलवन्दी गरिएको बताइएको छ।
