जनताका आकांक्षा पुरा गर्न असफल हुन्छौं कि भन्नेमा पार्टीपंक्ति चनाखो छ : अध्यक्ष दाहाल
पूर्वप्रधानमन्त्री तथा नेकपाका अध्यक्ष पुष्प कमल दाहाल प्रचण्डले पुराना ऐन, कानून तथा निति परिवर्तन गरेर भए पनि देशलाई समृद्ध बनाउनु पर्ने बताउनुभएको छ ।
नेपाल पर्यटन यातायात व्यवसायी संघको १५ औँ वार्षिक साधारणसभाको आज काठमाडौंमा उद्घाटन गर्दै अध्यक्ष प्रचण्डले पुराना कानून र ऐनलाई समयानुकुल परिवर्तन गरी बिकास निर्माणको यात्रालाई निरन्तरता दिनु पर्ने बताउनुभएको हो ।
पुरानो ऐन कानूनका कारण मुलुकमा अन्तरबिरोध बढ्दै गएको भन्नु हुँदै अध्यक्ष प्रचण्डले पञ्चायतकालिन ऐन तत्काल संशोधन गर्न सरकारलाई आग्रह गर्नुभयो ।
उहाँले बर्तमान सरकार जनताको आकांक्षा पुरा गर्न असफल हुन्छ कि भन्ने तर्फ पार्टीपंक्ति चनाखो रहेको बताउनुभयो ।
मुलुकलाई समृद्ध बनाउने आधारको रुपमा रहेको पर्यटन क्षेत्रको बिकासमा आफूले सक्दो सहयोग गर्ने प्रतिबद्धता उहाँले व्यक्त गर्नुभयो । सरकारले व्यवसायीहरुलाई कर असुल्ने माध्यमको रुपमा मात्र नलिइ प्रोत्साहन गर्ने निति लिनुपर्ने बताउनु भयो ।
कार्यक्रममा संस्कृति, पर्यटन तथा नागरिक उड्डयन मन्त्री रविन्द्र अधिकारीले भिजिट नेपाल सन् २०२० लाई सफल बनाउन मन्त्रालय सक्रिय रहेको बताउनु भयो ।
उहाँले पर्यटनसँग जोडिएका सबै प्रकारका व्यवसाय मर्यादित र व्यवस्थित हुनुपर्ने बताउनुभयो ।
