लुक्ला उडेको विमान रामेछाप ओर्लिएपछि…
नेपाल वायुसेवा निगमले सोमबार वाई–१२ को चिनियाँ जहाज परीक्षण उडान गरेको छ ।
काठमाडौंबाट सोलुखुम्बुको लुक्लाका लागि उडेको नयाँ जहाज मौसमको प्रतिकूलताका कारण लुक्लामा अवतरण हुन नसकी रामेछापको मन्थलीमा अवतरण गराउनु परेको छ ।
परीक्षण उडानका लागि चालक दलका सदस्य र प्राविधिकसहित १० जनालाई बोकेर उडेको चिनियाँ विमान बाक्लो हुस्सु र बादलका कारण लुक्लामा अवतरण हुन नसकी रामेछापको मन्थली विमानस्थलमा अवतरण गराउनु परेको जनाइएको छ ।
मन्थलीबाट काठमाडौं फर्काइएको विमान मंगलबार बिहान साढे ५ बजे फेरि लुक्ला जाने निगम स्रोतले जानकारी दिएको छ । सोमबारको परीक्षण उडानको नेतृत्व क्याप्टेनद्वय आङ नुरी शेर्पा र उद्वव घिमिरेले गरेका थिए ।
जहाजको परीक्षण उडान सफलतापूर्वक सम्पन्न भएको पाइटललाई उद्धृत गर्दै निगम स्रोतले जनाएको छ । निगमका एक कर्मचारी भन्छन्, ‘‘यो हाम्रा लागि निकै ठूलो उपलब्धि र खुशीको कुरा हो, अब थन्किएको जहाज नियमित रुपमा उड्ने छ ।’
मंगलबार बिहान लुक्लाको परीक्षण उडान सकिएपछि रारा, डोल्पा, सिमिकोट र जोमसोममा पनि परीक्षण उडान गरिने र त्यसलगत्तै यात्रुहरुका लागि व्यवसायिक उडान शुरु गरिने वायुसेवा निगमले जनाएको छ ।
