वीर अस्पताल डुबाउन उपेन्द्र यादवको यस्तो चलखेल

 

स्वास्थ्य तथा जनसंख्या मन्त्री उपेन्द्र यादव उमेर हदले ६५ बर्ष नाघिसकेका डा. डीएन साहलाई चिकित्सा विज्ञान राष्ट्रिय प्रतिष्ठान(न्याम्स)को उपकुलपति बनाउने निर्णयमा पुगिसकेका छन् ।

 

मन्त्री यादव संयोजक, डा. धर्मकान्त बाँस्कोटा र डा. सुशील प्याकुरेल सदस्य रहेको रहेको न्याम्स उपकुलपतिसिफारिस समितिले डा. डीएन साह, ढुण्डीराज पौडेल र डा. अजित रायमाझीको नाम सिफारिस गर्ने निर्णय गरेको छ । न्याम्सको उपकुलपतिका लागि २२ जनाले आवेदन दिएकोमा ६ जनाको नाम सर्टलिष्टमा परेका थिए ।

 

सर्टलिष्टमै चलखेल

सर्टलिष्टमा परेका ६ चिकित्सकहरुमा अजित रायमाझी, गेहनाथ बराल, ढुण्डीराज पौडेल, देवनारायण साह(डीएन) विधाननिधि पौडेल र विश्वनाथ यादव थिए । यी ६ जना उत्कृष्ट चिकित्सकका रुपमा छनोटमा परे । तर उत्कृष्ट भनेर सर्टलिष्टमा परेका डा. गेहनाथ बराल न्याम्समै एमडीमा अध्ययनरत विद्यार्थी हुन् ।

 

जुन संस्थामा अध्ययन गरिरहेको छ, त्यही संस्थाको उपकुलपतिमा दाबी गर्ने बराललाई सर्टलिष्टमा ६ जनाभित्र छनोट गरिनुले योग्य ब्यक्तिलाई पन्छाएर अयोग्य ब्यक्तिको संख्या बढाउने र उपकुलपतिमा आफ्नो मान्छे साहलाई पार्ने खेल मन्त्री यादवबाट खेलिएको वीर अस्पतालका एक चिकित्सकले बताएका छन् ।

 

ती चिकित्सका अनुसार न्याम्सको उपकुलपतिका लागि एक से एक विज्ञ चिकित्सकले निवेदन दिए पनि उनीहरुलाई सर्टलिष्टबाटै आउट गरिनुको कारण साहलाई उपकुलपति बनाउनका लागि थियो ।

 

न्याम्सको उपकुलपतिका लागि २२ जना चिकित्सकले दिएको निवेदनमा सर्टलिष्टमा ६ जनाको निकालिएको र त्यसक्रममै डा. डीएन साहलाई नियुक्ति गर्न सजिलो हुनेगरी निकालिएको थियो ।

 

चिकित्सकहरु लोकविक्रम थापा, रमेशकान्त अधिकारी, दामोदर पोखरेल, सेनेन्द्रराज उप्रेती, भगवान कोइराला, डा. केके राई, अन्जनीकुमार झा, डा. जगदिशप्रसाद अग्रवाल र अर्जुन कार्की रहेको विज्ञ टोलीले ६ जनाको नाम सर्टलिष्टमा पारेको थियो ।

 

साह किन भीसीका लागि अवैधानिक छन् ? 
न्याम्सको उपकुलपतिमा आवेदन दिनका लागि न्यूनतम योग्यताको क्रम संख्या २ मा नेपाल सरकारको ११ औं तहको चिकित्सक वा अवकाशप्राप्त चिकित्सक हुनुपर्ने उल्लेख छ । मापदण्डमा उल्लेखित त्यस्तो चिकित्सक ६३ बर्ष उमेर पूरा गरिसकेको हुन्छ । नेपालको संविधान अनुसार पनि ६५ बर्षभित्र कुनै पनि ब्यक्ति सेवानिबृत्त हुन्छ ।

 

डीएन साहको उमेर ६५ बर्ष ११ महिना ३ हप्ता पुगिसकेको छ, सोमबारको साँघुमा समाचार छ । संवैधानिक रुपमा अवकाश हुनुपर्ने ब्यक्ति आँखा अस्पतालमा काम गरेर अवकाश जीवन बिताएको ४–५ बर्ष भइसकेका साहलाई उपकुलपति बनाउन योजनाबद्ध रुपमा उपेन्द्र महतो लागेका छन् । यसमा ठूलै रकमको चलखेल महतोमार्फत् भएको स्रोत बताउँछ । स्रोतका अनुसार साहलाई उपकुलपति बनाउन २५ करोड लगानी भएको छ ।

 

उपेन्द्र महतो किन लागे ?
महतो र डा. डीएन साह सुडी हुन् । उनीहरु जातिगत आधारमा एकै जातिमा पर्दछन् । दोस्रो, रोजगारी नपाई बसेका ब्यक्तिलाई आकर्षक स्थानमा नियुक्त गराई वीर अस्पताललाई नियन्त्रणमा लिने महतोको उद्देश्य देखिन्छ ।

 

वीर अस्पताललाई डुबाउने र उनको मेडिसिटीको ब्यापार चम्काउने खेल पनि महतोले खेलेका छन् । मेडिसिटी निर्माणमा उपेन्द्र महतोले उनका भिन्न भएका भाइ वीरेन्द्र महतो र बुहारी कीर्ति महतोको नामको बैंकको सेयर समेत बैंकमा धितो राखी लगानी गरेका छन् ।

 

वीर अस्पताल डुबेपछि स्वभाविक रुपमा बिरामीको चाप मेडिसिटीतर्फ लाग्नेछ । अतः उनले वीर अस्पताललाई जनकपुर चुरोट कारखाना बनाई मेडिसिटीलाई सूर्य टोबाको कम्पनी बनाउन खोजेका छन् ।

 

यसका लागि डा. डीएन साह नियुक्त हुनासाथ वीर अस्पताल भक्तपुरको दुवाकोटमा सार्ने योजना महतोको छ । हाल वीर अस्पताल रहेको भवन र जाइकाले पछाडि बनाउँदे गरेको भवनमा सिटी क्लीनीक संचालन गरी त्यो क्लीनीक नयाँ चिकित्सकलाई जिम्मा लाउने र पुराना र अनुभवी चिकित्सक जति सबै भक्तपुरको दुवाकोटमा पठाउने रणनीतिमा छन् ।

 

नर्सिङ कलेज रहेको उत्तरतर्फको खाली जग्गालाई लिजमा दिई संचालन गर्ने योजनामा महतो छन् । यो योजना पार लगाउन महतोले बीचौलिया दीपक तिमल्सिनालाई हातमा लिई उनी मार्फत् प्रधानमन्त्री केपी शर्मा ओलीकै निजी सचिवालयसम्म पुगेका छन् ।

 

बीचौलिया तिमल्सिना प्रधानमन्त्री ओलीका निजी सचिव राजेश बज्राचार्यसम्म नै पुगी साहलाई नै उपकुलपति बनाउने भूमिका खेलेको बताउन थालेका छन् । तिमल्सिनाले बज्राचार्यको नवविवाहिता डाक्टर श्रीमतीलाई मेडिसिटीमा आकर्षक तलव सुविधा दिएर जागिरमा नियुक्त गरेको गफ समेत दिने गरेका छन् ।

 

न्याम्समा उमेर हद किन लाग्दैन ?

संवैधानिक निकाय अख्तियार दुरुपयोग अनुसन्धान आयोग, लोकसेवा आयोग, महालेखा परीक्षक कार्यालयको पदाधिकारी हुन उमेर हद ६५ बर्ष तोकिएको छ । ६५ बर्ष उमेर पुगिसकेपछि संवैधानिक निकायबाट अवकाश हुनुपर्छ ।

 

तर न्याम्सको उपकुलपतिमा आवेदन दिएका डा.डीएन साहको उमेर हद ६५ बर्ष नाघिसकेको छ । उनको उमेर ६५ बर्ष ११ महिना २० दिन भइसकेको छ । ६५ बर्ष पुगिसकेपछि मानिसले काम गर्न नसक्ने भएकै कारण उमेर हद राखिएको हो ।

 

निजामती सेवामा ५८ बर्ष उमेर हद छ । स्वास्थ्य सेवामा ६० बर्ष छ । संवैधानिक निकायमा ६५ बर्ष छ । तर न्याम्सको उपकुलपतिका लागि ६५ बर्ष उमेर कटिसकेका साहलाई नियुक्ति गर्न स्वास्थ्यमन्त्री लागेका छन् ।

 

स्वास्थ्य मन्त्री यादवले उमेरले नेटो काटिसकेका साहलाई उपकुलपतिबनाएर न्याम्स (वीर अस्पताल)को विकास गर्न खोजेका हुन् कि स्वास्थ्य माफियाको स्वार्थ पूरा गर्न खोजेका हुन् ? न्याम्स के बुढाखाडा थुपार्ने ठाउँ हो भन्दै वीर अस्पतालका चिकित्सकहरु नै बिरोधमा छन् ।

 

बीर अस्पतालका चिकित्सकहरुले न्याम्सबाहिरबाट उपकुलपति बन्न आए आफूहरुलाई मान्य नहुने भन्दै चेतावनी दिदै आएका छन् । र, न्याम्स बाहिरका उपकुलपतिनियुक्ति गर्ने संकेत पाएपछि अस्पतालमा काम ठप्प पार्ने चेतावनी कर्मचारी र चिकित्सकहरुले दिइसकेका छन् ।

नयाँपेजबाट