अब कर्मचारीलाई सहुलियमा घर, निजी क्षेत्रका कर्मचारीले पनि पाउने
के तपाई कर्मचारी हुनुहुन्छ ? अनि बस्नका लागि आवासको समस्या खेपिरहनु भएको छ ? चिन्ता नलिनुस् अब तपाईले सहुलियतको आवास सुविधा पाउनु हुने भएको छ ।
सरकारी मात्र होइन निजी क्षेत्रमा जागिर खाइरहेकाले पनि यो सुविधा पाउने भएका छन् ।
कर्मचारी सञ्चय कोषले सञ्चयकर्ताहरूलाई सहुलियतमा घर उपलब्ध गराउने भएको छ । तर यसरी उपलब्ध गराउने घरको मूल्य भने सञ्चयकर्ताले तिर्नुपर्ने छ ।
सञ्चयकर्ताले कमाएको जति खान र बस्नमा धेरै खर्च भएर बचत न्यून हुँदै गएपछि सुरक्षित जीवनका लागि अवकास योजना अन्तर्गत यो कार्यक्रम ल्याइएको सञ्चय कोषका प्रमुख प्रशासकीय अधिकृत तुलसीप्रसाद गौतमले बताएका छन् ।
सरकारी तथा निजी क्षेत्रका कर्मचारीहरू जो सञ्चयकोषमा सञ्चयकर्ता छन् । उनीहरूले यस्तो सुविधा पाउने छन् ।
यसमा सञ्चय कोषले जग्गा खरिद गरेर त्यसमा हाउजिङ वा सामूहिक आवासको संरचना बनाउने छ । त्यसरी बनेको आवासको लागतमा बढीमा १० प्रतिशत जोडेर सञ्चयकर्तालाई कोषले उपलब्ध गराउने छ ।
यसको परीक्षणको रूपमा कोषले चितवनमा रहेको जग्गामा हाउजिङ बनाउने काम पनि शुरू गरिसकेको गौतमले जानकारी दिएका छन् ।
चितवनका लागि घरको डिजाइनको काम सकिएको उनले बताए । हाल कोषमा ६ लाख संचयकर्ता छन् । जसमा १ लाख ६० हजार जति निजी क्षेत्रमा कार्यरत रहेका छन् ।
