सुतिरहेकी महिलामाथि सामुहिक बलात्कार, बालिका बलात्कृत

 

सोलुखुम्बुको सोताङ गाउँपालिका– २ माझखर्कमा ५० वर्षीया अपाङ्गता भएकी महिलाई तीन जनाले सामुहिक बलात्कार गरेका छन् । कान नसुन्ने र बोल्न नसक्ने महिलालाई तीन जनाले बलात्कार गरेको जाहेरी प्रहरीमा परेको छ ।

१ असोज राति घरमा सुतेकी ती महिलालाई बलात्कार गरेको आरोपमा मध्यदुधकोशी–८ का गिरीधन राईसहित तीन जनाको नाममा पीडित परिवारले जाहेरी दिएको र आरोपितहरुको खोजी भई रहेको प्रहरीले जनाएको छ ।

यता सुससरीको धरान उपमहानगरपालिका–११ स्थित सामुदायिक वनमा शनिबार साँझ १२ वर्षीया बालिका बलात्कृत भएकी छन् ।

स्थानीय शेर्पा संघको वन घेरिएको कम्पाउण्डभित्र साँझ साढे ६ बजे बालिकालाई बलात्कार गरेको अभियोगमा प्रहरीले सोही वडाको सगरमाथा टोल बस्ने दुर्गाबहादुर बिकलाई पक्राउ गरिएको छ ।

भोजपुर घोडेटारस्थित रानीबास घर भएका बिकलाई पीडित परिवारको जाहेरीका आधारमा पक्राउ गरिएको प्रहरीले जनाएको छ ।