ओली सरकार आएपछि भ्रष्टाचार बढ्यो : महामन्त्री थापा
राष्ट्रिय प्रजातन्त्र पार्टी (प्रजातान्त्रिक) का महामन्त्री सुनिलबहादुर थापाले अहिले देशमा भ्रष्टाचार बढेको बताएका छन् ।
नेकपा अध्यक्ष केपी ओली सुशासनको नारासहित सरकारमा आए पनि भ्रष्टाचार भने रोकिनुको सट्टा बढिरहेको बताए । महामन्त्री थापाले पत्रकारसँग आज कुरा गर्दै अहिले नागरिकको मौलिक हक समेत वर्तमान सरकारले कुण्ठित गरेको आरोप लगाए ।
थापाले भ्रष्टाचार र अधिनायकवाद बढेकाले त्यसका बारेमा आवाज उठाउने समय आएको उल्लेख गरे । फरक प्रसङ्गमा थापाले देशलाई सही दिशा दिनका लागि आफ्नो पार्टीबीचको एकता वर्तमान समयको आवश्यकता रहको विचार व्यक्त गरे ।
‘त्यसैले हामी राप्रपा, राप्रपा (प्रजातान्त्रिक), राप्रपा (राष्ट्रवादी बीच एकता गर्ने तर्खरमा छौ’, थापाले भने, ‘हामी सांगठनिकरुपमा दीर्घकालसम्म एकता नभाँडिने तरिकाले एकता गछौं ।एकताका लागि काम शुरु भइसकेको छ ।’
