घुससहित महानगरपालिकाका शाखा अधिकृत र सुब्बा पक्राउ
अख्तियार दुरुपयोग अनुसन्धान आयोगको टोलीले वीरगञ्ज महानगरपालिकाका दुई कर्मचारीलाई घुससहित पक्राउ गरेको छ ।
सेवाग्राहीबाट घुस लिइरहेको अवस्थामा आयोग मध्यक्षेत्रीय कार्यालय हेटौडाको टोलीले बिहीबार महानगरका कर्मचारी पक्रेको हो ।
पक्राउ पर्नेमा शिक्षा शाखाका अधिकृत मन्जुर आलम र सुब्बा शशिभूषण साह छन् । उनीहरूलाई एक लाख घुससहित पक्राउ गरिएको अख्तियारले जनाएको छ ।
वीरगञ्ज महानगरपालिका–१४ स्थित अर्कोन इन्टरनेसनल एकेडेमी बोर्डिङ स्कुल दर्ता गर्ने क्रममा सो एकेडेमीका एकवाल हैदरसँग कर्मचारीले घुस मागेको बताइएको छ ।
शशिभूषणका भान्जा अरबिनकुमार साहको पसलमा पैसा लिन लगाइएको र दिने क्रममा पक्राउ गरिएको बताइएको छ । अरबिनकुमारलाई पनि अख्तियारले पक्राउ गरेको छ ।
