माइतीघर मण्डलामा सय मिटर अग्लो राष्ट्रिय झण्डा
संविधान दिवसको अवसरमा सत्तारुढ दल निकट युवा संगठनले राष्ट्रियता, स्वाधीनता र स्वाभिमानलाई मजबुत बनाउनुपर्ने भन्दै राष्ट्रिय झण्डा फहराएको छ ।
तत्कालीन नेकपा (एमाले) निकट युवा संघ नेपाल र तत्कालीन नेकपा (माओवादी केन्द्र) निकट वाइसिएल नेपालको संयुक्त आयोजनामा काठमाडौँको माइतीघर मण्डलामा १०० मिटर लामो झण्डोत्तलन गरेका हुन् ।
योग्य तथा दक्ष युवा विदेशमा जानुपर्ने बाध्यता अन्त्य गर्नु अहिलेको आवश्यकता रहेको भन्दै संगठनका नेताले रोजगारमुखी नीति तथा कार्यक्रमलाई वर्तमान सरकारले अघि सारेकोले त्यसलाई सफल बनाउनुपर्नेमा जोड दिएका थिए ।
त्यस्तै संविधानमा कहीँ कतै कमिजोरी भएमा आपसी छलफल तथा संवाद्को माध्यमबाट हल गर्दै आर्थिक, सामाजिक तथा सांस्कृतिक रुपान्तरणमा सबै राजनीतिक दल एकढिक्का भएर अघि बढ्नुपर्नेमा जोड दिइएको थियो ।
युवा संघ नेपालका अध्यक्ष रमेश पौडेलले जनताको अधिकार लिपिबद्ध भएको दिनमा मुलुकलाई समृद्धिको बाटोमा अघि लानुपर्ने बताए । अध्यक्ष पौडेलले हजारौंको बलिदानबाट प्राप्त संविधानलाई कार्यान्वयन गर्न र गराउन सम्पूर्ण राजनीतिक दल, वुद्धिजीवी, जनतासमेत लाग्नुपर्नेमा जोड दिए ।
वाइसिएल नेपालका अध्यक्ष रामप्रसाद सापकोटा (दिपसिखा)ले वर्तमान संविधानले महिला, दलित, अल्पसंख््यक, पिछडिएको वर्गलगायत सम्पूर्ण नेपालीको भावनालाई समेटेको उल्लेख गर्दै संविधानमाथि गलत प्रचार गरी अनावश्यक भ्रम फैलाउन नहुने बताए ।
