प्रहरी प्रमुख खनालले एसएसपीसहित ५ सय प्रहरीमाथि किन गरे कारबाही
नेपाल प्रहरीका पाँच सय जना कार्बाहीमा परेका छन् । कार्बाही पर्नेमा बरिष्ठ प्रहरी उपरीक्षकदेखि कार्यालय सहयोगीसम्म छन् ।
पछिल्लो चार महिनामा प्रहरी प्रधान कार्यालयले नियमावली विपरीत काम गर्ने ४९४ प्रहरीलाई कार्बाही गरेको हो । वैशाखमा २ जना बरिष्ठ प्रहरी उपरीक्षक (एसएसपी) सहित १६५ जना कार्बाहीमा परेका थिए ।
३३ किलो सुन र सनम शाक्य हत्या प्रकरणको अनुसन्धानका क्रममा एसएसपी दिवेश लोहनी र एसएसपी श्याम खत्री निलम्बनमा परेका थिए । संगठनको नीति विपरित गतिविधि गर्ने ४ प्रहरी कर्मचारीलाई बर्खास्त गरिएको छ ।
यस्तै विभिन्न दर्जाका ७५ प्रहरीलाई नसिहत दिइएको थियो । १२ को ग्रेड रोक्का, ९ को ग्रेड घटुवा, ९ को पदोन्नति रोक्का, एक जनाको पद घटुव र २२ जनालाई निलम्बन गरिएको प्रहरी प्रधान कार्यालयले जनाएको छ ।
जेठमा ३६ जना प्रहरीलाई कार्बाही गरिएको छ । असारमा १६५ जना प्रहरी कार्बाहीमा परेका छन् । तीमध्ये १४ जना निलम्बनमा परेका छन् भने बाँकीलाई कसुर अनुसारको कार्बाही गरिएको छ ।
साउनमा १२९ जना प्रहरीलाई विभिन्न कार्बाही गरिएको छ ।
महानिरीक्षक नियुक्त भएपछि सर्वेन्द्र खनालले संगठन सुधारका लागि १० बुँदे योजना सार्वजनिक गरेका थिए । यही अवधिमा प्रधान कार्यालयले राम्रो काम गर्ने प्रहरीलाई पुरस्कृत पनि गरेको छ । ४ महिनामा १ हजार ३५३ जना प्रहरी पुरस्कृत भएका छन् ।
