हाम्रो इकोनोमि

 

 

उदयपुरको घुर्मीमा जीप दुर्घटना हुँदा एकको मृत्यु भएको छ। काठमाडौंबाट ओखलढुंगातर्फ आउँदै गरेको एवान सिटीभिलेज यातायातको ना१ज ७९६९ नम्बरको जीप उदयपुरको कटारी नगरपालिका- १४ घुर्मी बजार नजिक बादुरामा दुर्घटना भएको हो।

दुर्घटनामा विदेशी नागरिक हुलेस सेभेलको घटना स्थलमै ज्यान गएको घुर्मीका ट्राफिक प्रहरीका इन्चार्ज रामकुमार शाहले बताए।  जीपमा सवार २ विदेशी नागरिकमध्ये मृतक महिला हुन्। उनी कुन देशकी नागरिक हुन् भन्ने खुलेको छैन। चालक र एक विदेशी नागरिकसहित ८ जना घाइते भएका छन्।

घाइतेमध्ये २ जनाको अवस्था गम्भीर छ। उनीहरुलाई उपचारका लागि राजधानी पठाउने तयारी भइरहेको प्रहरीले जनाएको छ।

हतकडीसहित फरार रहेका अभियुक्त ११ दिनपछि पक्राउ

हतकडीसहित फरार एक अभियुक्तलाई प्रहरीले ११ दिनपछि पक्राउ गरेको छ। सुनकोशी गाउँपालिका-३ रातमाटाबाट फरार भएका सञ्जय परियारलाई प्रहरीले आइतबार राति बसपार्कबाट पक्राउ गरेको हो।

सर्लाही ईश्वरपुरा नगरपालिका-५ का १७ वर्षीय परियार जबरर्जस्ती करणीको अभियोगमा काठमाडौंबाट पक्राउ गरी सर्लाही लैजाने क्रममा गत भदौ २१ गते हतकडीसहित बाटोबाटै भागेका थिए।

परियारलाई बसपार्कमा काम गर्दै गरेको अवस्थामा पक्राउ गरिएको प्रहरी उपरीक्षक रामेश्वरप्रसाद यादवले जानकारी दिए। उनलाई आवश्यक कारवाहीका लागि सर्लाही प्रहरीको जिम्मा लगाइएको छ।