नागढुंगामा सुरुङ मार्ग निर्माण कार्य छिट्टै शुरू हुने, २० मिनेटमै नौबिसेबाट सीतापाइला
राजधानी भित्रिने प्रमुख नाका नागढुंगामा सवारी आवागमनको चाप घटाउन सुरुङ मार्ग निर्माण कार्य तत्काल अघि बढ्ने भएको छ ।
गत वर्ष नै विस्तृत परियोजना प्रतिवेदन (डीपीआर) तयार भइसकेको र सुरुङ मार्ग वरिपरिको जग्गाको मुआब्जा समेत निर्धारण भई काम अघि बढेको सडक विभागले जनाएको छ ।
यसअघि गत महिना बोलपत्र आह्वान गरिसकेको र आगामी एक महिनाभित्र ठेक्का सम्झौता हुने विभागका उपमहानिर्देशक सञ्जयकुमार श्रेष्ठले बताए ।
उनले लोकान्तरसँग भने, ‘सुरुङ मार्ग निर्माणको मुआब्जा वितरण पनि शुरू भएको छ । निर्माण कार्यको टेन्डरको निकालेको ठीक एक महिना भयो । एक महिनाभित्र टेन्डर राख्छन् र तीन चार महिनाभित्र काम शुरू हुन्छ ।’
जापानी सहयोग नियोग (जाईका)को सहयोगमा निर्माण हुने सुरुङ मार्ग २ दशमलव ४५ किलोमिटर लम्बाइको हुनेछ ।
धादिङको नौबिसेनजिकै पर्ने सिस्ने खोलाबाट नागढुंगाभित्र फेदीमा अवस्थित बस्नेत छाप जोड्ने सुरुङ मार्ग निर्माण भएपछि काठमाडौं भित्रिन र काठमाडौंबाट बाहिरिन निकै सहज हुनेछ ।
सुरुङ मार्गलाई सिधै सीतापाइलासँग जोड्न लिंक रोड निर्माण हुनेछ । नागढुंगा सुरुङ मार्ग आयोजनाका लागि जाईकाले १७ अर्ब रुपैयाँ ऋण सहयोग उपलब्ध गराउने सम्झौता भइसकेको छ ।
श्रेष्ठका अनुसार जापानले नेपाल सरकारलाई शुन्य दशमलव ०१ प्रतिशत ब्याजदरमा यो ऋण उपलब्ध गराएको हो । ४० वर्षभित्र तिरिसक्नु पर्ने यो ऋणको अवधि ३० वर्षको हुनेछ भने १० वर्ष ग्रेस अवधि थपिने छ ।
यो सडकका लागि नेपालमा निर्माण हुन लागेको पहिलो सुरुङ हो ।
यस्तो बन्नेछ सुरुङ मार्ग
सडक विभागका अनुसार सीतापाइलाबाट लिंक रोडसहित ६ किलोमिटरको यस खण्डमा सुरुङ भने धादिङको सिस्नेखोलादेखि नागढुंगाभित्र पर्ने बस्नेत छापसम्म मात्र हुनेछ ।
सुरुङको लम्बाइ कुल २ दशमलव ४५ किलोमिटर हुनेछ । सीतापाइला-नौबिसे सडकखण्ड पनि अहिलेको भन्दा ८ किमी छोटिनेछ ।
यस खण्डमा दुईवटा पुल र २ वटा कल्भर्ट निर्माण हुनेछन् । १२ मिटर चौडाइको यो सडकमा दुवैतिर १ र १ मिटरको फूटपाथ राखिने छ । सुरुङमा १४ वटा भेन्टिलेटर र जेट फ्यान जडान हुनेछन् ।
सरकारले सुरुङ मार्गलाई अत्याधुनिक सुविधासहित निर्माण गर्ने योजना बनाएको छ ।
यसमा दुई लेनको सडकसहित पेट्राल पम्प, सर्भिस सेन्टर लगायतका सुविधाहरू पनि राख्ने अवधारणा छ ।
सुरुङ मार्ग टू प्लस वान लेन मापदण्डको हुन्छ । टू प्लस वान लेन सडक खण्डमा दुबै साइडका सडक बेलाबेलामा २ लेनमा परिणत हुने र कुनैबेला वान लेनमा खुम्चने हुन्छ ।
एकपट्टिको सडक २ लेन हुँदा अर्कोपट्टिको सडक १ लेनमा परिणत हुन्छ ।
सुरुङ मार्ग निर्माणपछि २० मिनेटमै नौबिसेबाट काठमाडौं आइपुगिने विभागले जनाएको छ ।
