किन लुकायो प्रहरीले सुन्धारा गोली काण्ड ?
प्रहरीले एक युवतीका प्रेमी पक्रनका लागि सुन्धारामा गोली चलाएको स्थानीयले दावी गरिरहेका बेला प्रहरीले भने घटनालाई लुकाएको छ ।
एक युवतीलाई धम्क्याएको आरोप लागेका किसन राईलाई नियन्त्रणमा लिन प्रहरीले गोली चलाएको तर, राई बचेर फरार रहेको स्थानीय प्रत्यक्षदर्शीले बताए पनि प्रहरीले भने स्थानीयको भनाइमा कुनै सत्यता नभएको दावी गरेको छ ।
महानगरीय प्रहरी परिसर काठमाडौंका सई लोकेन्द्र पन्थको टोलीले किसन राई नामका व्यक्तिमाथि गोली चलाएको हो । तामाङ थरकी युवतीलाई राईले धम्क्याउने गरेको सूचना परिसर प्रमुख एसएसपी वसन्त लामा समक्ष पुगेपछि प्रहरी परिचालन भएको थियो ।
प्रहरी आएपछि भाग्दै गरेका राईमाथि गोली चलाइएको प्रत्यक्षदर्शीले बताएका छन् । ‘उनी भाग्दै गर्दा गोली चलाइयो’, एक प्रत्यक्षदर्शी भन्छन् । राई दरबारमार्गस्थित किंस लाउन्ज बारका सञ्चालक रहेको जनाइएको छ ।
परिसरका प्रवक्ता एसपी रामदत्त जोशीले गोली चलाएको विषय अफवाह भएको दाबी गरेका छन् । राईविरुद्ध पक्राउ पूर्जी जारी नभई प्रहरीले गोली चलाएकाले घटना गुपचुप राखेको प्रहरी स्रोतको दाबी छ । ती युवतीले पनि प्रहरीमा लिखित जाहेरी नदिएको स्रोतले जनाएको छ ।
