काठमाडौं प्रहरी प्रमुख भन्छन्– गुन्डागर्दी, तस्करी र लागूऔषध नियन्त्रण मेरो प्राथमिकता
महानगरीय प्रहरी परिसर, काठमाडौंका प्रमुख एसएसपी वसन्त लामाले राजधानीमा सुसुप्त अवस्थामा रहेको गुन्डागर्दी, तस्करी, संगठित अपराध र लागूऔषध कारोबारको नियन्त्रण आफ्नो प्राथमिकतामा रहेको बताएका छन् ।
परिसर प्रमुख भएर आएपछि सञ्चारकर्मीहरुसँग कुराकानी गर्दै लामाले आफ्नो प्राथमिकताबारे जानकारी दिँदै ती क्षेत्रहरुको निगरानीको लागि सूचना संयन्त्र परिचालन गरिएको बताएका हुन् ।
‘पहिलेको जस्तो अवस्था त छैन । दादा भनिएकाहरु करिब करिब शान्त छन्’, लामाले भने, ‘यद्यपि, लुकीछिपी उनीहरुले व्यवसायीबाट पैसा असुल्न छाडेका छैनन् ।’ उनले त्यस्ता गतिविधिमा संलग्नहरुको पहिचान गरी कठोर रुपमा प्रस्तुत हुने बताए ।
लामाले आम नागरिकलाई समेत साथमा लिएर अघि बढ्ने विश्वास व्यक्त गरे । उपत्यकाको सुरक्षा अवस्थामा आफूले ३ दिनमा अनुभव गरेको बताउँदै उनले पीडितको गुनासोलाई विशेष प्राथमिकतामा राख्ने योजना रहेको समेत सुनाए ।
‘घटनै हुँदैन भन्ने होइन । घटनापछि प्रहरी तुरुन्त त्यहाँ पुग्न सक्नु र अनुसन्धानपछि यथासिघ्र सत्य, तथ्य बाहिर ल्याउनु चाहिँ मुख्य कुरा हो’, लामाले भने ।
गृहमन्त्रालयले ३० साउनमा लामालार्इ काठमाडौं प्रहरी प्रमुखमा नियक्त गरेको थियो । उनी यसअघि ३८ क्वीन्टल सुन तस्करी प्रकरणको अनुसन्धान समितिमा थिए ।
