गुडिरहेको यात्रु बसमा पेट्रोल बम प्रहार, एकजना घाइते
रुपन्देहीको तिलोत्तमा नगरपालिका(१५ पथ्थरडाँडा स्थित यात्रुवाहक बसमा अज्ञात समूहले पेट्रोल बम प्रहार गरेको छ ।
पोखराबाट भैरहवा आउँदै गरेको लु १ ख ६६२१ नम्बरको यात्रुवहाक बसमा पेट्रोल बम प्रहार गरिएको प्रहरीले जनाएको छ ।
पेट्रोल बम प्रहार गरिएपछि बसमा सवार यात्रु रेशमबहादुर थापा घाइते भएको जिल्ला प्रहरी कार्यालय रुपन्देहीका डिएसपी कुमोद ढुंगेलले जानकारी दिए । प्रहरीले बम प्रहार गर्ने समूहको खोजीकार्य गरिरहेको जनाएको छ ।
विप्लव माओवादीले आह्वान गरेको बन्दका कारण रुपन्देहीको जनजिवन प्रभावित भएको छ । बन्दका कारण सिद्धार्थ राजमार्ग र हुलाकी मार्गमा सवारीसाधनका साधन चलेका छैनन् । मोटरसाइकल र साना सवारीहरु समान्य रुपमा चलेका छन् ।
भैरहवाबाट छुट्ने लामो र छोटो दुरीका बस भैरहवा बसपार्कमै थन्किएका छन् । शिक्षण संस्था, उद्योग, कलकारखाना, बजार, बैंक वित्तिय संस्था लगायत सबै बन्द छन् । बन्दका कारण भारतबाट आउने नेपालीहरु सीमानाका बेलहियामा अलपत्र परेका छन् ।
