शहरी क्षेत्रका किशोरकिशोरी डेटिङ स्पटमै यसरी पर्छन हिंसामा, शारीरिक तथा मानसिक हिंसा बढी
शहरी क्षेत्रका युवा एवं किशोरकिशोरीहरु ‘डेटिङ हिंसा’ को जोखिममा रहने गरेको एक अध्ययनले देखाएको छ ।
युवा तथा किशोरकिशोरीहरुको क्षेत्रमा कार्यरत गैरसरकारी संस्था युवालयले गरेको सर्वेक्षणले प्रेम सम्बन्धमा किशोरकिशोरीहरु मध्ये कतिपयले डेटिङका क्रममा आफ्नै प्रेमीप्रेमिकाबाट हिंसा भोगिरहेको देखाएको हो ।
अन्तर्राष्ट्रिय युवा दिवसका अवसरमा सार्वजनिक गरिएको प्रतिवेदन अनुसार करिब २० प्रतिशतले किशोरकिशोरीले विभिन्न प्रकारको शारीरिक हिंसा भोगेका छन् ।
संस्थाले १ सय ५५ जना किशोरकिशोरीमाथि गरेको सर्वेक्षणका क्रममा ७२ जनाले आफू परिवार तथा साथीसङ्गीसँग रहेका बेला प्रेमीप्रेमिकाले किचकिच गर्ने, दिक्क लगाउने लगायतका मनोवैज्ञानिक हिंसामा पार्ने गरेको उल्लेख गरेका छन् ।
उनीहरुले प्रेमी वा प्रेमिकाले गाली गर्ने, सामानहरू फालिदिने, धकेलिदिने लगायतका कार्य गर्ने गरेको उल्लेख गरेका छन् ।
सर्वेक्षणमा सहभागीमध्ये करिब १५ प्रतिशतले आफूलाई प्रेमीप्रेमिकाले चुम्बन लगायतका यौनजन्य क्रियाकलाप गर्न दबाब दिएको बताएका थिए ।
नेपालको समाज तथा संस्कृति पितृसत्तात्मक रहेको भनिए पनि डेटिङ हिंसाको अभ्यास गर्ने र त्यसको पीडा भोग्नेमा महिला तथा पुरुष दुबै बराबर जिम्मेवार रहेको पाइएको युवालयका कार्यक्रम संयोजक सबिन बुढाथोकीले बताए ।
