गुणस्तरहिन सिमेन्ट बेचेरे उपभोत्ता ठग्ने सगरमाथा सिमेन्टमा सिलबन्दी
गुणस्तरहिन सिमेन्ट बेच्ने गरेको खुलासा भएपछि सगरमाथा सिमेन्टको परिक्षण प्रतिवेदन नआउदासम्म विक्री वितरणमा रोक लगाइएको छ । दाङको घोराहीबाट उत्पादित सो सिमेन्ट ‘गुणस्तरहीन’ भएको घटना सार्वजनिक भएपछि गुणस्तर तथा नाप तौल विभागले विहीवार परिक्षण प्रतिवेदन नआउँदा सम्मको लागि उत्पादन र विक्रि वितरणमा रोक लगाएको हो ।
गुणस्तर तथा नाप तौल विभागको टोलीले दाङको घोराहीस्थित उद्योगबाट ओपिसी र पिपिसी सिमेन्टको नमुना परिक्षणका लागि काठमाडौं लगेको छ । टोलीले साउन १७ गते उत्पादन भएको र १६ गते उत्पादन भएर १८ गते तुलसीपुर क्षेत्रमा बिक्री भएको सिमेण्टका नमूना परीक्षणका लागि लिएको छ ।
विभागका निर्देशक मनोजकुमार उपाध्यायले नमुना काठमान्डौं लगेर परिक्षण गरिने र त्यसको प्रतिवेदन नआउँदा सम्म उत्पादन तथा विक्रि वितरणमा पूर्णरुपमा रोक लगाएको जानकारी दिनुभयो ।
विभागका मेकानिकल ईन्जिनियर उमेशकुमार यादवले प्रतिवेदन सार्वजनिक हुन झन्डै एकदेखि डेढ महिनाको समय लाग्न सक्ने जानकारी दिनुभयो । बर्दियामा सगरमाथा सिमेण्ट प्रयोगका क्रममा कमसल भएको उजुरी परेपछि परिक्षण गर्दा ओपीसीमा म्याग्नेसिया तत्व बढी देखिएको जिल्ला प्रशासन कार्यालय बर्दियाले जनाएको छ ।
बर्दिया प्रशासनले दाङ प्रशासनलाई पत्र लेखी सिमेण्टमा भेटिएको कमजोरीबारे जानकारी गराएको थियो । उद्योगले दैनिक २ हजार टन सिमेण्ट उत्पादन गर्दै आएको छ ।
