विपक्षी दलका नेता देउवा विदेश गएपछि संवैधानिक परिषद्को बैठक स्थगित
प्रधानन्यायाधीश सिफारीसका लागि आज अपरान्ह बोलाइएको संवैधानिक परिषदको बैठक स्थगित भएको छ । परिषद्का सदस्य समेत रहेका विपक्षी दलका नेता शेरबहादुर देउवा बैठकमा उपस्थित नहुने भएपछि बैठक स्थगित भएको हो । देउवा आज मध्यान्ह उपचारका लागि सिंगापुर जादैछन् । पेटका उपचारका लागि उनी देउवा सिंगापुर जान लागेको पार्टी प्रवक्ता विश्वप्रकाश शर्माले जानकारी दिए।
न्याय परिषद्को बैठकले वरिष्ठताका आधारमा ओमप्रकाश मिश्र र चोलेन्द्रशमसेर जवराको नाम संवैधानिक परिषदमा पठाइसकेको छ । त्यही मध्ये एक जनालाई सिफारिस गर्ने तयारी भईरहेको छ । यसअघि परिषदले जेठ २९ गते न्यायाधीश दीपकराज जोशीलाई प्रधानन्यायाधीशमा सिफारिश गरेको थियो । तर, संसदीय सुनुवाइ समितिले जोशीलाई अस्वीकृत गरिदियो । गत फागुन ३० गते प्रधानन्यायाधीश गोपाल पराजुली पदमुक्त भएपछि सर्वोच्च अदालत नेतृत्वविहीन छ।
बहालावाला न्यायाधीशमध्ये ओमप्रकाश मिश्र र चोलेन्द्र शमशेर राणा प्रधानन्यायाधीशका दाबेदार हुन् । दुई जनामध्ये वरिष्ठताको आधारमा ओमप्रकाश मिश्रको नाम सिफारिस हुने सम्भावना बढी छ । संवैधानिक परिषदको अध्यक्षमा प्रधानमन्त्री रहने व्यवस्था छ ।
