असान्दर्भिक मुद्दामा अल्झेर नबसी देश विकासमा लागौ : प्रधानमन्त्री ओली
प्रधानमन्त्री केपी शर्मा ओलीले अहिले कसैले पनि विगतका असान्दर्भक मुद्दाहरुमा अल्झेर बस्ने भन्दा पनि देश विकास कसरी हुन्छ भन्ने कुरामा चिन्तित हुनुपर्ने बताएका छन् ।
राजपाका नेताहरुबीच बिहीबार साँझ बालुवाटारमा भएको प्रम ओलीले तराईको समग्र विकासका लागि बृहत योजना बनाउने प्रस्ताव अघि सारेका छन् । राजपा नेताहरुसँग भएको भेटघाट कार्यक्रममा प्रधानमन्त्री ओलीले यस्तो प्रस्ताव राखेका हुन् । भेटमा राजपाका नेता महन्थ ठाकुरले प्रधानमन्त्री ओलीलाई ज्ञापनपत्र बुझाएका थिए । प्रधानमन्त्री ओलीले ज्ञापनपत्र ग्रहण गर्दै राजपाले विगतमा उठाएका कतिपय माग असान्दर्भिक भइसकेको प्रतिक्रिया दिएका थिए । ‘हिजोका कतिपय माग आज असान्दर्भिक भइसकेका छन्, त्यसमा तपाईंहरुले पनि पुनर्विचार गर्नुहोस्’, प्रधानमन्त्री ओलीले राजपाका नेताहरुलाई भने ।
संविधान संशोधनका बारेमा नेताहरुले राखेका जिज्ञासामा प्रधानमन्त्री ओलीले आवश्यकता र औचित्यका आधारमा संविधान संशोधन हुने बताएका छन् । ओलीले भने, ‘संविधानमा देखिएका त्रुटिहरुमा छलफल गरौं, तर यसैमा अल्झिएर नबसौं । अब देश विकासमा एकजुट भएर लागौं ।’
राजपाका नेताहरुले तराईको बाढी, मधेस आन्दोलनका घाइतेको अवस्था र मुद्दा, तराईको विकास, मधेस र थारु आन्दोलनको छानबिनका लागि बनेको आयोगको प्रतिवेदन र संविधान संशोधनका विषयमा प्रधानमन्त्रीसँग छलफल गरेका थिए । छलफलमा राजपा नेताहरु ठाकुर, राजेन्द्र महतो, शरतसिंह भण्डारी, महेन्द्रराय यादव, राजकिशोर यादव र केशव झाको सहभागिता थियो । भेटघाटमा प्रधानमन्त्री ओलीले तराईको विकास, चुरे संरक्षणको ठोस कदम, तटबन्ध, उद्योग स्थापनालगायतका लागि बृहत योजना बनाउन प्रधानमन्त्रीले प्रस्ताव गरेको ओलीका प्रेस संयोजक चेतन अधिकारीले जानकारी दिएका छन् ।
अधिकारीले भने, ‘प्रधानमन्त्री ओलीले तराईको विकासका लागि मानसिकता पनि परिवर्तन गर्नुपर्ने बताउनु भएको छ ।’ सुगम ठाउँ भएर पनि न्यून साक्षरता दर, विभिन्न सामाजिक विकृतिबाट तराईका जनतालाई मुक्त पार्नुपर्ने प्रधानमन्त्रीको भनाई थियो । ‘यी सबै समस्या समाधानका लागि राजनीतिक रुपमा योजन बनाउने र कार्यान्वयन गराउन प्रधानमन्त्रीको योजना रहेको अधिकारीले बताए । अघिल्लो सरकारका बेला अघि सारेको जनता आवास कार्यक्रम प्रभावकारी नभएकाले त्यसको साटो तराईमा पनि एकीकृत वस्ती बसाउने सरकारको योजना रहेको प्रधानमन्त्रीले राजपा नेताहरुलाई जानकारी गराएको अधिकारीले बताएका छन् ।
