सूचना टाँसेर संसद साउन ११ गतेसम्मका लागि स्थगित
बिहीबारको संसद बैठक सूचना टाँस गरेर स्थगित भएको छ। सभामुख कृष्णबहादुर महराले संसद आज १ बजेका लागि डाकिएको बैठक विशेष कारणवश भन्दै साउन ११ गतेसम्मका लागि स्थगित गरेका हुन्।
नेपाली कांग्रेसले संसद अवरोध गर्ने आफ्नो निर्णयबाट पछाडि नहट्ने जनाएपछि महराले सूचनामार्फत् बैठक स्थगित गरेका हुन्।
कांग्रेसले चिकित्सा शिक्षा अध्यादेशको प्रावधान विधेयकमा परिवर्तन गरेको विरोधमा संसद अवरोध गर्दै आएको छ।
असार ३२ गतेका दुई बैठक पनि कांग्रेसले अवरोध गरेको थियो।
राष्ट्रिय सभा बैठकसमेत यसअघि नै ८ गते सम्मका लागि स्थगित भैसकेको छ।
सरकारले संसदमा दर्ता गराएको चिकित्सा शिक्षा विधेयकको विरोधमा डाक्टर गोविन्द केसी २० दिन देखि जुम्लामा अनसनमा छन्। केसीको स्वास्थ्य जटिल बनेको भन्दै कांग्रेसले उनको माग पूरा गराउन संसद अवरोध गरेको हो।
सभामुख कृष्णबहादुर महराले चिकित्सा शिक्षा विधेयक कार्यसूचीबाट हटाउने जनाए पनि कांग्रेसले अडान यथावत् राखेको थियो।
