१–३ को पढाइ अब अंग्रेजी माध्यमबाटै

रुकुमको आठबीसकोट नगरपालिकाभरका सामुदायिक विद्यालयले आगामी शैक्षिक सत्रदेखि गणित, विज्ञान विषय पनि अंग्रेजी माध्यममै पढाउने भएका छन् ।

नगरपालिकाका ६१ विद्यालयले कक्षा १ देखि ३ सम्मका विद्यार्थीलाई गणित र विज्ञान विषय पनि अंग्रेजी माध्यममै पढाउने भएका हुन् । पढाइको गुणस्तर तल्लो कक्षाबाटै सुधार्ने भन्दै नगर शिक्षा समितिको निर्णय अनुसार नगरपालिकाका सबै विद्यालयले आगामी वैशाखबाट सञ्चालन हुने नयाँ शैक्षिक सत्रदेखि कक्षा १–३ सम्मका ३ विषय अनिवार्य अंग्रेजी माध्यममै पढाउने निर्णय गरेका हुन् । समितिले आयोजना गरेको बैठकमा सहभागी सबै विद्यालय व्यवस्थापन समिति अध्यक्ष तथा प्रधानाध्यापकहरूले तल्लो कक्षाका पनि केही विषय अंग्रेजी माध्यममा पढाउने निर्णय भएको हिमालय मावि खदीका प्रधानाध्यापक कृष्णराज केसीले बताए । ‘पढाइको गुणस्तर तल्लो तहबाटै सुधार गरौं भन्ने समितिको प्रस्तावमा हामी सबै विद्यालय र व्यवस्थापन समितिको सहमति भयो,’ उनले भने ।

बैठकबाट विद्यालयको समग्र अवस्था सुधार्न प्रमुख प्रशासकीय अधिकृतका रूपमा रहने प्रधानाध्यापकले आगामी वैशाखसम्मको कार्ययोजना समितिमा पेस गर्ने, नयाँ शैक्षिक सत्र सुरु भए पुनस् ५ वर्षको विद्यालय सुधार योजना तथा कार्य योजना तयार गर्ने निर्णय गरेको छ । विद्यालय सुधार योजनारकार्ययोजनाका आधारमा प्रअ नियुक्ति गर्ने गरी निर्णय भएको छ ।
शिक्षा क्षेत्रमा हाल देखिएको अस्तव्यस्त सुधारका लागि कार्ययोजना उत्कृष्ट बनाउने शिक्षकलाई नै प्रअमा नियुक्त गर्ने निर्णय समितिले गरेको प्रस्ताव पनि बैठकले अनुमोदन गरेको छ । शिक्षक तथा विद्यार्थीको पोसाक अनिवार्य गर्ने त्यसका लागि १ देखि ३ कक्षासम्मका विद्यार्थीलाई नगरपालिकाले एक जोर पोसाक प्रदान गर्नेछ । नगरपालिकाले एक जोर र अभिभावकले एक जोर पोसाक बनाइदिने तथा ४ देखि १२ सम्मका विद्यार्थीलाई अनिवार्य २ जोर पोसाक बनाउन लगाउने निर्णयमा पनि विद्यालयहरू सहमत भएका छन् ।

शिक्षाको गुणस्तर विकास गर्न कक्षा ८ को परीक्षालाई मर्यादित बनाउने जसका लागि २/३ विद्यालयका विद्यार्थी एउटा परीक्षा केन्द्रमा राखेर परीक्षा गराउनेमा सहमति जुटेको छ । केन्द्रमा जुन विद्यालयका विद्यार्थी छन् त्यहाँका शिक्षकलाई नपठाउने निर्णयमा पनि प्रअहरू सहमत भएको नगर शिक्षा समिति अध्यक्ष एवं नगर प्रमुख गोर्खबहादुर केसीले बताए