ऋणमा चुर्लुम्मै डुबेपछि एमालेसँग माओवादीले एकता गरेको यसरी भयो खुलासा

तत्कालीन माओवादी केन्द्रले आफ्नो सम्पत्ती विवरण संकलन थालेको छ । तत्कालीन एमालेसँग पार्टी एकतापछि ‘नेपाल कम्युनिस्ट पार्टी’को स्वामित्वमा लिनका लागि सम्पत्तीको एकिन विवरण खोज्न थालिएको हो ।

तत्कालीन एमाले र माओवादी एकीकरणपछि नेपाल कम्युनिस्ट पार्टी एशियाकै तेस्रो ठूलो कम्युनिस्ट पार्टी बनेको छ । सम्पत्तीको एकिन विवरण त तयार पारिएको छैन तर, एमालेको भन्दा माओवादीसँग चल-अचल सम्पत्ति कम छ ।

तत्कालीन माओवादीका एक नेताले भने, ‘हामीसँग एक अर्ब जति सम्पत्ती होला, तर हाम्रोभन्दा धेरै एमालेसँग छ ।’

हाल कोटेश्वर पेरिसडाँडामा तत्कालीन माओवादीको पार्टी कार्यालय र सो कार्यालयले चर्चेको जग्गा छ । पेरिसडाँडाँको भवन र जग्गा मजदुर संगठनको नाममा छ।

नेकपाका नेता एवम् तत्कालीन माओवादी कार्यालयका मुख्यसचिव प्रह्लाद बुढाथोकीका अनुसार पेरिसडाँडामा दुईवटा बिल्डिङ, एउटा टहरोसहित ६ रोपनी जग्गा छ । उनले भने, ‘काठमाडौंमा पार्टीले प्रयोग गरेको यही ६ रोपनी हो, बाँकी विवरण जिल्ला जिल्लाबाट संकलन गर्दैछौं ।’

पेरिसडाँडाबाहेक तत्कालीन माओवादी कर्मचारीको आफ्नै जग्गा र भवन छ । बबरमहलस्थित सडक बिभागको ठीक अगाडिको जग्गा सरकारले उपलब्ध गराएपछि कर्मचारीले आफ्नै खर्चमा भवन बनाएका छन् । यसको फिनिसिङको काम बाँकी नै छ ।

यसबाहेक धेरैजसो जिल्लामा आफ्नै जग्गा र भवन छन् । प्रायजसो सबै सहिद स्मृति प्रतिष्ठानको नाममा छन् । ‘पार्टीको नाममा कसैले पैसा नदिने भएकाले प्रतिष्ठानमार्फत् जग्गा र भवनको व्यवस्था गरेर पार्टी कार्यालय सन्चालन हुँदै आएको छ । त्यो पार्टीकै सम्पत्ति हो,’ माओवादीका एक नेताले भने ।

चितवनमा १० कठ्ठा जग्गामा भब्य भवन बनाइएको छ । यसमा वैद्य माओवादीले समेत दावी गरेपछि झडपको स्थिति आएको थियो । त्यसैगरी रुकुमको सेरिगाउँ, रोल्पा, कास्की, गोर्खा, सुर्खेत, दैलेख, झापाको दमक लगायतका स्थानमा पनि तत्कालीन माओवादीको आफ्नै कार्यालय छ ।

नगदबारे बोल्न अनिच्छुक

नगद कति छ भन्ने हिसाब पनि माओवादीसँग छैन । नेताहरु नगदको विषयमा खुलेर बताउन चाहँदैनन् । नगद मौजदातको तुलनामा ऋणको बारेमा भने उनीहरु खुलेर कुरा गर्छन् । रुकुमका एक नेताले भने, ‘ऋणको कुरै नगरम्, कुरा गरेर साध्य छैन ।’

तत्कालीन माओवादीका मुख्य सचिव प्रह्लाद बुढाथोकीले ऋणको एकिन हिसाब नभएको बताए । उनले भने, ‘हिसाब निकालिसकेका छैनौं । तर, करोडमा छैन, लाखमा ऋण होला ।’

जिल्लाका अधिकांश नेताहरुले चुनावको बेला ऋण लिएर खर्च चलाएका थिए । ति ऋण तिर्न बाँकी रहेको जिल्लामा क्रियाशील नेताहरु बताउँछन् । तर, उनीहरुले पनि ठ्याक्कै यति ऋण छ भनेर भन्न सकेका छैनन्