इंगलिस प्रिमियर लिगको उपाधि म्यान्चेस्टर सिटीलाई, म्यान्चेस्टर युनाइटेड स्तव्ध
काठमाडौं । इंगलिस प्रिमियर लिग फुटबलको उपाधि म्यान्चेस्टर सिटीले जितेको छ । आइतबार राति भएको खेलमा दोस्रो स्थानको म्यान्चेस्टर युनाइटेड घरेलु मैदानमै लिग तालिकाको पुछारमा रहेको वेष्टब्रोमसँग पराजित भएपछि सिटीले पाँच खेल अगावै उपाधिमाथि कब्जा गरेको हो ।
युनाइटेडलाई अप्रत्यासित हार चखाउन वेष्टब्रोमका जय रोड्रिग्वेजले खेलको ७३ औं मिनेटमा गोल गरेका थिए ।
लिगमा युनाइटेडले पाँच खेल खेल्न बाँकी रहँदा सिटीभन्दा १६ अंकले पछि छ ।
घरेलु मैदानमै लिगको पुछारमा रहेर रेलिगेशन कुरिरहेको वेष्टब्रोमसंग हार बेहोरेपछि प्रशिक्षक जोजे मौरिन्होको दिनगन्ती सुरु भएको बताइन्छ ।
३३ खेलमा २८ जित, ३ बराबरी र २ वटामा मात्र पराजय भोगेको सिटीले ९३ गोल गरेको छ भने २५ गोलमात्र खाएको छ ।
सिटीको सातौं सिजनमा यो तेस्रो प्रिमियर लिग उपाधि हो ।
हारपछि भने युनाइटेडको दोस्रो स्थान पनि सुरक्षित देखिएको छैन ।
