प्रदेश ४ का मुख्यमन्त्री गुरुङ र सभामुख अधिकारीले लिए शपथ
प्रदेश नम्बर ४ का मुख्यमन्त्री पृथ्वी सुब्बा गुरुङले शपथ लिएका छन्।
मुख्यमन्त्री पृथ्वीसुब्बा गुरुङसँगै सभामुख नेत्रनाथ अधिकारीले पनि आजै शपथ लिएका हुन्।
गुरुङलाई शुक्रबार प्रदेश ४ का प्रदेश प्रमुख बाबुराम कुबँरले शपथ गराएका हुन्। आइतबार संसदीय दलको नेतामा निर्विरोध निर्वाचित भएका गुरुङलाई सोमबार प्रदेश प्रमुखले मुख्यमन्त्रीमा नियुक्त गरेका थिए। त्यसपछि, बुधबार नै शपथ ग्रहणको कार्यक्रम राखिएकोमा गुरुङकी कान्छी आमाको निधन भएपछि शपथ दुई दिन पछि सरेको थियो।
अधिकारी बिहिबार मात्रै सभामुखमा निर्वाचित भएका थिए। शपथ ग्रहण कार्यक्रम प्रदेश प्रमुखको निवास रत्नचोकमा भएको हो।
मुख्यमन्त्री गुरुङले उद्योग पर्यटन वन तथा वातावरण मन्त्रीमा रामशरण बस्नेतलाई शपथ गराएका छन्। उनी एमालेका तर्फबाट गोर्खाबाट सांसद बनेका हुन् ।
