प्रदेश प्रमुखको शपथग्रहण आज, शीतल निवासमा भव्य तयारी
देशका सातवटै प्रदेशका नवनियुक्त प्रदेश प्रमुखहरुले आज पद तथा गोपनीयताको शपथग्रहण लिने भएका छन् ।
आज अपरान्ह ४ बजेसम्ममा राष्ट्रपति कार्यालय शीतल निवासमा प्रदेश प्रमुखले शपथग्रहण गर्ने तयारी रहेको राष्ट्रपति विद्या भण्डारीका प्रमुख स्वकीय सचिव भेषराज अधिकारीले जानकारी दिए ।
सरकारले बुधबार प्रदेश प्रमुखको नियुक्तिका लागि राष्ट्रपतिलाई सिफारिस गरेअनुसार आज प्रदेश प्रमुखले शपथ लिन लागेका हुन् । हिजो सार्वजनिक बिदा परेका कारण शपथग्रहण हुन सकेको थिएन ।
मन्त्रिपरिषद्को बुधबारको बैठकले कांग्रेस र मधेसवादी दलको भागवण्डाका आधारमा प्रदेश १ मा गोविन्द सुब्बा, २ मा रत्नेश्वर लाल कायस्थ, ३ मा अनुराधा कोइराला, ४ मा बाबुराम कुँवर, ५ मा उमाकान्त झा, ६ मा दुर्गाकेशर खनाल र ७ मा मोहनराज मल्ललाई प्रदेश प्रमुख नियुक्त गरेको थियो ।
