विप्लवका कार्यकर्ताले वर्षमान पुनको हत्या प्रयास असफल, यसरी भयो फाएरिङ
नेकपा माओपादी नेत्रविक्रम चन्दका कार्यकर्ताले माओवादी केन्द्रका नेता वर्षमान पुनको हत्या गर्ने प्रयास गरेको छन् । वर्षमान पुन चढेर हिडेको गाडीलाई लक्षित गरी भिरबाट ठूलाठूला ढुङ्गा लडाई हत्या गर्ने प्रयास भएको थियो तर सफल हुन सकेन । सुरक्षकर्मीले फाएरिङ गरेपछि अभियुक्तहरु भागेका थिए । पूर्वमाओवादी नेता नेत्रविक्रम चन्दका कार्यकर्ताले आफ्नै पूर्वसहकर्मी वर्षमान पुनको चुनावी अभियानमाथि निरन्तर अवरोध गर्न थालेका छन् ।
शनिबार वर्षमान चढेको गाडीलाई लक्षित गरेर माइन बिस्फोट गराइएको थियो भने आइतबार भीरबाट ढुंगा लडाउने र सानो हतियारबाट फायरिङ गर्ने काम भएको छ ।
आइतबार दिउँसो रामचीबाट दुईखोलीतर्फ आमसभाका लागि हिँडेको वर्षमान पुनको टोलीलाई भीरबाट ढंगा लडाएर विप्लवका कार्यकर्ताले करिब २ घण्टासम्म बाटैमा रोकेका छन् ।
विप्लवका कार्यकर्ताले भीरबाट ढुंगा लडाएर गाडी रोकेपछि छोटो हतियारबाट फायरिङ गरेका थिए । प्रहरीले जवाफी फायरिङ गरेर उनीहरुलाई धपाएको थियो ।
यसक्रममा ३ जना विप्लवका कार्यकर्तालाई घटनास्थलबाटै प्रहरीले पक्राउ गरेको छ । आक्रमणकारीलाई प्रहरीले भीर आसपासबाट सर्च गरेर पक्राउ गरेको हो ।
वर्षमान पुनको चुनावी टोलीमाथि दिनहुँ आक्रमणको प्रयास भइरहे पनि विप्लव समूहले अहिलेसम्म घटनाको जिम्मेवारी लिएको छैन ।
तर, आफ्नै मित्रशक्तिमाथि सिलसिलेवार रुपमा सांघातिक हमला हुन थालेपछि यस्तो घटना विप्लव समूहले नै गराइरहेको छ या उनका नाममा वाम गठबन्धन विरोधी शक्तिले गरिरहेको छ भन्नेबारे गम्भीर प्रश्न उठेको माओवादी केन्द्रका एक जिल्ला नेताले बताए ।
शनिबार वर्षमानको टोलीलाई तर्साउने नियतले नभई सखाप नै पार्ने नियतले शक्तिशाली माइन बिस्फोट गराइएको थियो भने आइतबार गोली हान्ने प्रयास भएको थियो ।
घटनाको प्रकृति हेर्दा सामान्य अवरोध गर्ने मात्रै नभएर पुनमाथि सांशातिक आक्रमणकै षड्यन्त्र भइरहेको संकेत देखिएको सुरक्षा स्रोतको आँकलन छ ।
