बालबालिकालाई खेलकुद सामग्री वितरण
सप्तरीको राजविराज–९ स्थित मलेठका बाढीपीडित बालबालिकाका लागि खेलकुद तथा स्टेशनरी सामग्री वितरण गरिएको छ ।
चिकागो नेपाली तराई सोसाइटीले आइतबार जनसेवा राप्रावि मलेठमा अध्ययन गर्ने १५७ जना छात्रछात्रालाई कापी डटपेन, क्रिकेट खेल खेल्ने ब्याट दुई थान, बल दुई थान, दुई भलिबल, ब्याडमण्टिन, छ स्कीपिङलगायत खेलकुदका सामग्री वितरण गरेको हो ।
सो अवसरमा मारवाडी सेवा समितिका अध्यक्ष सुरेश अग्रवाल, मारवाडी युवा मञ्चका मधुसुधन कावरा, राहुल साह, सावन चौधरी र असोक ठाकुरले सोही विद्यालयका छात्रछात्राको लागि खाजाका लागि बिस्कुट, चाउचाउ, फ्रुटी, वितरण गर्नुभएको संस्थाका मधुसुधन कावराले बताउनुभयो ।
म्यादी प्रहरीमा दश हजार आवेदन दर्ता
आगामी मंसिरमा हुन लागेको प्रतिनिधिसभा र प्रदेशसभा निर्वाचनको लागि आह्वान गरिएको म्यादी प्रहरी भर्नाका लागि भर्ना हुनेको यहाँ भीड लागेको छ ।
जिल्ला प्रहरी कार्यालय सप्तरीले म्यादी प्रहरी भर्नाको लागि दरखास्त आह्वान गरेपछि युवाको व्यापक आकर्षण बढेको पाइएको छ । बढ्दो बेरोजगारीका कारण यतिखेर मधेशका युवा चर्को घाम, भोकभोकै र राति खुल्ला आकाशमुनि बसेर भए पनि फारम भर्नमा व्यस्त देखिएको हनुमानगर कंकालनी नगरपालिका–२ बाट म्यादी प्रहरीमा भर्नाको लागि आवेदन दर्ता गर्नको लागि सदरमुकाम राजविराज आउनुभएका वीरेन्द्र प्रमाणीले बताउनुभयो ।
विगतको भर्नामा महिला सहभागिता न्यून देखिएको भए पनि हाल महिला सहभागिता अत्यधिक बढेको जिल्ला प्रहरी कार्यालय सप्तरीका प्रहरी उपरीक्षक मुकेशकुमार सिंहले बताउनुभयो ।
उहाँले असोज २४ गतेदेखि म्यादी प्रहरी भर्नाका निवेदन खुलेकोमा हालसम्म १० हजार जनाले आवेदन दर्ता गराइसकेको जानकारी दिनुभयो ।
