चुनावको मुखमा कांग्रेस–माओवादी बाझा बाझमा उत्रिए,को-को भए खुसी?
तेस्रो चरणको स्थानीय तहकोे मिति नजिकिदै जाँंदा सत्ता गठबन्धनकाका मुख्य दुईदल कांग्रेस–माओवादीका शीर्ष नेताहरु बीचनै खटपट सुरु भएको छ । पहिलो र दोस्रो चरणको स्थानीय निर्वाचनमा केही ठाँउमा गठबन्धन गरेका नेपाली कांग्रेस र माओवादी केन्द्रबीचको सम्बन्धमा खटपट शुरु भएको नेताहरुको आरोप प्रत्यारोपमा सजिलै बुझ्न सकिन्छ । बिशेष गरी तेस्रो चरणमा दुई पार्टीबीच चुनावी तालमेल नभए पछि त्यसको दोष एक अर्कालाई लगाएका छन् । सर्लाहीको लालबन्दी र मलंगवा लगायतका ठाँउमा अन्तिम चरणमा आएर तालमेल भाडिएको थियो ।
प्रमुख प्रतिपक्षी दल एमाले विरुद्ध सवै तहका निर्वाचन र निर्वाचनपछि पनि सहकार्य गर्ने उद्घोष दुवैदलका प्रमुख नेताले पटक–पटक गरेका भएपनि तेस्रो चरणको स्थानीय निर्वाचनमा आफूले सोचे अनुरुप तालमेल हुन सकेन ।
सत्तारुढ कांग्रेस–माओवादीका नेताहरुले एक अर्कालाई आफ्नो पुच्छर भएको आरोप लगाएका छन् । प्रदेश २ को स्थानीय तह चुनाव प्रचारका क्रममा तराईमा रहेका माओवादी अध्यक्ष पुष्पकमल दाहालले कांग्रेसको अहंकारका कारण प्रदेश २ को स्थानीय तहमा प्रभावकारी तालमेल हुन नसकेको वताएकै भोलिपल्ट कांग्रेसका शीर्ष नेताले त्यसको खण्डन गरे ।
सरकारका मुख्य घटक दुवै दलले तीनै तहका चुनाव र अन्य सामाजिक संघ संस्थाका चुनावमा पनि तालमेल गर्दै आएका छन् । चुनावी तालमेल गरे पनि स्थानीय तहका २ चरणका निर्वाचनमा एमाले सबैभन्दा ठूलो दल बनेको छ ।
आलोपालो सरकारको नेतृत्व गर्ने सम्झौता गरी सरकारमा साझेदारी गरिरहेका दुई दल बीच आगामी प्रदेश सभा र प्रतिनिधि सभाको चुनावमा समेत चुनावी तालमेल गर्ने योजना रहेको स्रोतको दाबी छ ।
प्रदेश नं २ मा हुने तेस्रो चरणको स्थानीय चुनावमा उनीहरुले वडा तहदेखि प्रमुख उपप्रमुख पदमा संयुत्तः उम्मेदवारीको गृहकार्य गरेका थिए । तर, वडाका उम्मेदवारमा भागबण्डा नमिल्दा उनीहरुले सोचेजस्तो औपचारिक तालमेल हुन सकेन । यसकै आवेगमा दुई दलका नेताहरुले एक अर्कालाई आफ्नो दलको पुच्छर भएको वताएका हुन् ।
‘माओवादीले केही गर्न पनि सक्दैन, उसको कुनै हैसियत पनि छैन’ वीरगञ्जमा बिहीबार आयोजित सभालाई सम्बोधन गर्दै कांग्रेस महामन्त्री कोइरालाले भने । यसको एकदिनअघि माओवादी अध्यक्ष दाहालले कांग्रेसको अहंकारका कारण चुनावमा तालमेल प्रभावकारी हुन नसकेको बताएका थिए ।
दाहालले कांग्रेसको अहंकारका कारण तालमेल हुन नसकेको अभिब्यक्ति दिएपछि कांग्रेस कार्यकर्ताहरुले त्यसप्रति तीब्र प्रतिक्रिया दिएका छन् । अहिले सामाजिक संजालमा कांग्रेस कार्यकर्ताहरुले पहिलो चरणमा भएको भरतपुर महानगरको चुनावी तालमेललाई लिएर आफ्नो वालमा असन्तुष्टि पोखिरहेका छन् । ‘भरतपुरमा वडा अध्यक्ष समेत जित्ने हैसियत नभएकी आफ्नी छोरीलाई कांग्रेसले मेयर बनाइदिने अनि उल्टै कांग्रेसलाई अहंकारी भन्ने ?’ कांग्रेस कार्यकर्ताहरुले प्रश्न उठाएका छन् ।
पहिलो चरणको स्थानीय निर्वाचनमा भरतपुर महानगरमा मेयरमा कांग्रेसले माओवादी केन्द्रलाई समर्थन गरेको थियो भने पोखरा लेखनाथ महानगरमा माओवादी केन्द्रले कांग्रेसलाई सघाउने तालमेल भएको थियो ।
