बाढी पीडितलाई सरकारले नगदै दिने,एक जनाले प्रतिदिन कति पाउछन?
बाढी पीडितका लागि राहत वितरणमा एकद्वार प्रणाली लागू गर्ने सरकारको निर्णय कार्यान्वयन नगर्न सर्वोच्च अदालतले आन्तरिम आदेश दिए पछी बाढीप्रभावित क्षेत्रमा पीडितहरुलाई सीधै नगद बाँड्ने सरकारले निर्णय गरेको छ। आज गृह मन्त्रालयमा आयोजित पत्रकार सम्मेलनमा गृहमन्त्री जनार्दन शर्माले पीडितलाई प्रति व्यक्ति दैनिक ७० रुपैयाँ दिने जानकारी दिए।
‘यो ३० दिनका लागि हो’, मन्त्री शर्माले भने, ‘भोलिदेखि नै पीडितले ७० रुपैयाँ पाउने छन्। यो प्रभावकारी हुनेछ। राहतमा कुहिएको चामल खानुपर्दैन। आफै किनेर खान पाउँछन्।’
उनले गाउँ-गाउँमा पसल भएको र पीडितहरुले किनेर खान सकिने बताए। पसल नहुने स्थानमा खादय सस्थानले बिक्री गर्ने व्यवस्था गर्ने पनि उनले दावी गरे।
बाँकी पुननिर्माण र राहतको लागि पनि काम भइरहेको शर्माले बताए। ‘बाढीले क्षति भएका घरको पुननिर्माण केही महिनामा नै गर्छौँ। यो पटक भूकम्पमा जस्तो हुँदैन’, उनले भने।
