भारतीय दुताबासको रात्रिभोज,ओली र प्रचण्डले किन नगर्ने भए मोज?
भारतीय विदेशमन्त्री सुष्मा स्वराजको सम्मानमा भारतीय दूतावासले आयोजना गर्ने रात्रि भोजमा नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्ड अनुपस्थित हुने भएका छन् ।
भारत् सरकारकी विदेशमन्त्री स्वराज बिमस्टेक सम्मेलनमा भाग लिन नेपाल आउने भएपछि भारतीय राजदूत मञ्जिव सिंहले एक साताअघि ओली र दाहाललाई निम्तो दिएका थिए । ओली निवास बालकोट र प्रचण्ड निवास लाजिम्पाट पुगेर राजदूत सिंहले निम्तो दिएपनि दुवै नेता सहभागि नहुँने भएका छन् ।
आजै साँझ दूतावासले स्वराजको सम्मानका खातिर रात्रि भोज राखेको छ । भोजमा प्रधानमन्त्री, पूर्वप्रधानमन्त्री, दलका नेताहरुलाई बोलाइएको छ । तर एमाले र माओवादीको दुई प्रमुख नेता भने अनुपस्थित रहने भएका छन् ।
ओली आज पोखरा हुँदै मुस्ताङ जाने तयारीमा छन् । मुस्ताङमा तीन दिन बस्ने उनको योजना रहेको छ । उता दाहाल पनि आजै राजधानी बाहिर जान लागेको श्रोतले बताएको छ ।
