राप्रपा छाड्दै रेखा
काठमाडौँ । राप्रपा फुटेर अहिले दुई पार्टीमा विभाजित भएको छ । यस्तो अवस्थामा केही पशुपति शमसेर राणाले खोलेको दलतिर लाग्दैछन् भने काही कमल थापा नेतृत्वको राप्रपामा बस्ने निर्णय गरेका छन् । कोही भने दुबै पार्टीमा नरहने निर्ण गरेका छन् ।
पार्टी एकता भएसँगै हौसिएर राप्रपा प्रवेश गरेकी अभिनेत्रीदेखि अन्य व्यवसायी समेत अहिले राप्रपा छाड्ने मुडमा पुगेको खबर छ । राप्रपा कमजोर बनेसँगै अभिनेत्री रेखा थापाले पार्टी छाड्ने मुड बनाएकी छिन् । एकतापिछ राप्रपा बलियो भएको देखेर त्यसमा लागेकी उनी हाल पार्टी छाड्ने मुडमा पुगेकी स्रोतले बतायो ।
उनलार्इ पशुपति शमसेर राणाले समेत पार्टी फुटाउने क्रममा आफुसँग लिएर जान लागेका थिए । तर रेखाले त्यसरी पार्टी फुटाउन नहुनेमा जोड दिँदै आफु नजाने प्रष्ट पारेपछि उनी अहिले कमल थापा नेतृत्वको राप्रपामै छिन् ।
राणाले पार्टी फुटाउने विषयमा छलफल चल्दै गर्दा गायिका कोमल वली र थापाबीचमा अब के गर्ने भन्ने विषयमा समेत कुराकानी भएको थियो । थापाले पार्टी कमजोर हुँदै गएपछि त्यसमा बसिरहनुको अर्थ नभएको बताएकी छिन् । यद्यपी उनी कुनै निर्णयमा भने पुगेकी छैनन् ।
