संविधान संसोधनमा एमाले बाधक : देउवा
जनकपुरधाम । प्रधानमन्त्री शेरबहादुर देउवाले संविधान संशोधनमा नेकपा एमाले र राष्ट्रिय प्रजातन्त्र पार्टी बाधक रहेको बताएका छन् । प्रधानमन्त्री देउवाले राष्ट्रिय जनता पार्टी (राजपा) चुनावमा सहभागी हुने विश्वास पनि व्यक्त गरेका छन् ।
जनकपुरधाममा शुक्रबार पत्रकारहरूसँग कुराकानी गर्दै उनले मधेशका मुद्दाको सम्बोधन क्रमशः हुँदै गएका कारण राजपालाई चुनावमा जान वातावरण बनेको बताएका हुन । प्रधानमन्त्री देउवाले नेपाली कांग्रेस संविधान संशोधन विधेयकलाई पारित गराउन अग्रसर रहेको बताए ।
उनले एशियाली विकास बैंकको आयोजनाअन्तर्गत जनकपुरमा भइरहेको सडक र ढल निर्माण कार्यमा सहयोग गर्न जनकपुरवासीसँग आग्रह गरे । निर्वाचनमा नेकपा माओवादी केन्द्रलगायत इच्छुक दलसँग कांग्रेस तालमेल गर्ने पक्षमा रहेको उनको कथन थियो ।
