छोरा नपाएको र लेनदेनको विषयमा कुरा नमिलेपछि कपिलवस्तु नगरपालिका– ५ श्रीरामपुर गाउँकी २० वर्षिया सबिना खातुनलाई उनकै श्रीमान् दीलसार खान र सुसरा इजहार खानले निर्घात कुटपिट गरेका छन् । समाजमा चेतनशिल परिवारका रुपमा चिनिएको भए पनि खान परिवारले उक्त घटना घटाएर आफ्नै हुर्मत लिएका छन ।
साढे २ महिने दूधे छोरीलाई समेत सबिनाबाट अलग राखिएको छ ।दुवैले ११ साउनमा आफन्तको विवाह समारोहमै लठ्ठी मुक्का र लात्तीले आफ्नो छोरीलाई कुटेको पीडितका बुबा यशोधरा गाउँपालिका– ५ लोहोरौलीका लइस पठानले बताए। कुटपिटबाट सबिनाको कान, पिठ्युलगायत शरीरका विभिन्न भागका नील डाम परेको छ ।
तौलिहवामा उपचार हुन नसकेपछि उनलाई उपचारका लागि अहिले रुपन्देहीको भैरहवास्थित युनिभर्सल मेडिकल कजेलमा लगिएको र २ दिनको उपचारले केही विशेक भएपछि घर ल्याएको बुबा लइसले बताए । अहिले छोरीको अवस्थामा केही सुधार रहेको उनले बताएका छन् । घटनापछि छोरी निकै त्रसित बनेको र आफ्नो घरसमेत नजाने निर्णय गरेकी उनले बताए ।
पीडित सविनाले आफूलाई श्रीमान् र पति दुवैले विवाह भएको एकदुई महिनामै छोरा नपाए ठीक नहुने भन्दै धम्काउने गरेको सुनाइन् । छोरी पाएपछि त आफूलाई श्रीमानले दिनहु मानसिक तनाव दिने र कुटपिट गर्ने गरेको उनले बताएकी छन् । १४ महिनाअघि सविनाको दिलसारसँग धुमधामले विवाह भएको थियो । विवाहलगत्तै दिलसार र इजहारले आपूहरुलाई वारिसका लागि छोरा नै चाहिएको र छोरी पाए ठीक नहुने भन्दै छोरीलाई धम्की दिने गरेको पीडितकी आमा शायराले बताइन् ।
गत साउन ११ गते राति आफन्तको छोरीको विवाह समारोहमा ज्वाइँ र सम्धी मिलेर आफ्नै अगाडि निर्घात कुटेको उनले बताइन् । दुवैको मुस्लिम परम्पराअनुसार धुमधामसँग विवाह भएको थियो । घटना विषयमा पीडित र पीडक दुवै पक्षको प्रहरीमा उजुरी परेको जिल्ला प्रहरी कार्यालय महिला तथा बालबालिका सेलकी प्रहरी सहायक निरीक्षक इन्द्रा गिरीले बताइन् । दुवै पक्ष र पीडीत भनिएको महिलासँग कुराकानी गरेपछि सत्यतथ्य बाहिर आउने उनले बताइन् । सम्धी–सम्धीबीचको आपसी लेनदेनको विषयले उग्ररुप लिएर झगडा भएको अनुसन्धानबाट खुलेको प्रहरी नायब उपरीक्षक प्रह्लाद अधिकारीले बताए । ‘उनीहरुबीच आपसी लेनदेनको विषय रहेछ, उक्त विषयले महिलामाथि निर्घात कुटपिट हुनु अपराध हो,’ उनले भने ।
