सिन्धुपाल्चोकमा गयो डरलाग्दो पहिरो,भोटेकोशी माथिको लार्चा पुल बगायो
आइतबरा राति परेको वर्षासँगै आएको पहिरोले सिन्धुपाल्चोकको भोटेकोशी माथिको पुल बगाएको छ । बाह्रबिसे भन्दा झण्डै २४ किलोमिटर दूरीमा रहेको कोदारी राजमार्गमा पर्ने भोटेकोशी माथि बनाइएको लार्चा पुल पहिरोले बगाएको हो ।
पहिरोले पुल बगाएपछि तातोपानी गाउँपालिकाका दुई वडासँग सम्बन्ध विच्छेद भएको छ भने तत्काल बेलिब्रिज बनाउन नसके सर्वसाधारणलाई आवत जावत गर्न समेत कठिनाइ भएको पिटर श्रेष्ठले न्यूज अभियानलाई बताए ।
सुरक्षा निकायको टोली अहिले स्थलगत अध्ययनका लागि पहिरो प्रभावित क्षेत्रमा जाँदैछ ।
पहिरो खसेपछि भोटेकोशी आंशिक थुनिएकोमा अहिले पानीको निकास हुन थालेकोले पानीको बहाव बढ्न सक्ने हुँदा दोलालघाटसम्म नै खतरा हुन सक्ने हुँदा सतकर्ता अपनाउन उहाँको सुझाव छ ।
यसअघि तीन वर्ष अघि साउन महिनामा सिन्धुपाल्चोकको जुरेमा पहिरो जाँदा १४५ जनाको ज्यान गएको पुष्टि थियो । २०७२ सालमा गएको भूकम्पले पनि सिन्धुपाल्चोक निकै प्रभावित बनेको छ ।
भूकम्प पछि जमिन हल्लिएकाले यो जिल्लाको पहाडी भूभागमा सामान्य वर्षा हुँदा पनि पहिरो जान सक्ने बाढी विज्ञले बताएका छन् ।
