सांसद गुरुङद्वारा बाढीपीडितलाई राहत वितरण
राजविराज । नेपाली काँग्रेसका नेता एवम् सांसद धनराज गुरुङले सप्तरीमा एक हप्ता अगाडि विभिन्न खोलामा आएको बाढीबाट पीडितका लागि आफ्नो एक महिनाको तलबबाट राहत वितरण गर्नुभएको छ ।
जिल्लाको मोहुली खोलामा आएको बाढीबाट प्रभावित मैनाकडेरी, भेडिया र रघुनाथपुरका एक सय १० परिवारलाई उहाँले एक थानका दरले सुपरनेट झुल बाँड्नुभएको हो । बाढीबाट प्रभावित क्षेत्रका बस्ती तथा कटानको अवलोकन गर्दै तिरुहुत गाउँपालिकाको भेडियामा मोहुली खोलाले भत्काएको बाँध पुनःनिर्माणमा जुटेका नेपाली सेना र सशस्त्र प्रहरीको कामको निरीक्षणसमेत उहाँले गर्नुभयो ।
यस्तै नेपाल सशस्त्र प्रहरी परिवार महिला सङ्घ काठमाडाँैले सप्तरीको मेनाकडेरीमा स्वास्थ्य शिविरकोे आयोजना गरेको छ । सशस्त्र प्रहरी बल बेस क्याम्प मैनाकडेरीमा आयोजित सो शिविरमा करिब पाँच सय बाढीपिडित महिला, पुरुष र बालबालिकाको स्वास्थ्य परीक्षण गरिएको छ । शिविरमा डा रोशनकुमार झा, डा दीपेन्द्र तिमल्सिनालगायत स्वास्थ्यकर्मीको टोलीले स्वास्थ्य जाँच गर्दै निःशुल्क औषधिसमेत वितरण गरेको थियो ।
