प्रचण्ड भन्दा शेरबहादुर जाली, मन्त्री चुन्न नसक्दा सिंहदरबार खाली
काठमाडौँ । प्रधानमन्त्री शेरबहादुर देउवाले मन्त्रीमण्डल गठन गर्न नसक्दा मूलुककै मुख्य प्रशासनिक निकाय सिंहदरबार यतिखेर अभिभावक नभएको वालवालिका जस्तो टुहुरो भएको छ ।
एक महिना अघिदेखि नै मन्त्री विहिन मन्त्रालय अहिले सचिव पनि विदेश भ्रमणमा गएपछि टुहुरो बन्न बाध्य भएको हो । यसरी विभागीय मन्त्री पनि नहुने, भएको कर्मचारीहरु पनि विदेश भ्रमणमा रहेपछि जनताका कामहरु सुकाएको घाममा विष्कुनझै भएको छ ।
अहिले २३ मन्त्रालय मन्त्रीविहीन हुँदा सिंहदरबार परिसर सुनसानजस्तै देखिएको छ । विभिन्न मन्त्रालयका सचिव, सहसचिव, उपसचिव र शाखा अधिकृतहरू पनि विदेश भ्रमणमा जाने क्रम बढेको छ । असार मसान्तमा मन्त्रालयमा विभिन्न शीर्षकमा बाँकी रहेको बजेट सकाउनको लागि उच्चपदस्थ कर्मचारी विदेश भ्रमणमा जाने गरेका हुन् ।
विभिन्न अध्ययनको बहानामा उच्चपदस्थ सरकारी कर्मचारीहरू विदेश जान्छन् । कर्मचारीहरूले विदेश भ्रमणमा जाँदा दैनिक डेढ सयदेखि तीन सय ५० डलरसम्म भत्ता पाउने गर्छन् । युरोपियन देशहरूमा जाँदा सो रकममा ३३ प्रतिशत थप हुने गरेको छ । एनजिओ–आइएनजिओको खर्चमा जाने कर्मचारीले भने अझै बढी रकम पाउने गरेका छन् । यसरी कर्मचारीहरु विदेश गएपछि त्यहाँ गर्नुपर्ने कामहरु पेन्डिङमा रहेका छन् ।
