बहुचर्चित भरतपुर प्रकरणबारे सर्वोच्चमा बहस हुँदै, के हाेला अाज ?

गत असार ६ गते कामु प्रधानन्यायाधीश गोपाल पराजुली र न्यायाधीश हरिकृष्ण कार्कीको पुर्ण इजलासले च्यातिएको मत पत्र सहित निर्वाचन आयोग लगायतका सम्बन्धित सबै निकायले गरेका सम्पूर्ण निर्णयहरूको कागजात झिकाउने आदेश भएको थियो । सोहि आदेश बमोजिम भरतपुर महानगरपालिका वडा नम्बर १९ को मतगणना विवादबारे मुद्धाको सुनुवाईकोलागि आज सर्वोच्च अदालतमा बहस हुँदैछ । न्यायाधीशद्वय मिरा खड्का र अनिलकुमार सिन्हाको संयुक्त इजलास नं. सातको छैटौँ नम्बरमा मुद्धाको पेशी तोकिएको छ ।

गत जेठ २२ गते न्यायाधीश चोलेन्द्र शम्शेर ज.ब.रा.को एकल इजलाशले निर्वाचन आयोगको नाममा आदेश जारी गर्दै भरतपुर १९ मा पुनः मतदानका लागि कुनै कार्यक्रम सार्वजनिक नगर्न आदेश भएको थियो । माओवादी कार्यकर्ताले मतपत्र च्यातेपछि भरतपुर महानगरपालिकाको मत गणना रोकिएको थियो । निर्वाचन आयोगले १९ नम्बर वडामा पुनः मतदान गर्ने निर्णय गरेपछि आयोगको निर्णय बदर गर्न र स्थगित भएको मत गणना तत्काल चालु गराई पाउँ भनि एमालेका वडा अध्यक्ष उम्मेदवार गुन्जमान विश्वकर्मा समेत दुई जनाले सर्वोच्चमा रिट दायर गरेका थिए ।

 

अदालतले निर्वाचन आयोगको यस सम्बन्धि गरेको निर्णयको प्रतिलिपि, मुख्य निर्वाचन आयोगको प्रतिवेदन, च्यातिएको मतपत्र, प्रहरीले उठाए घटनास्थलको मुचुल्का, मतगणना स्थगित गर्ने निर्णय र सूचनाको प्रतिलिपि, निर्वाचन अपराध मुद्धाको मिसिलको प्रतिलिपि र अनुगमन समितिको निर्णय र प्रतिवेदनको प्रतिलिपि लगायतका कागजात झिकाउन आदेश गरेको हो । सम्बन्धीत कार्यलयहरुले सबै कागज पत्र सर्वोच्च अदालतमा बुझाई सकेको छ ।