डोटीको पूर्वीचौकी गाउँपालिका र लेटाङ नगरपालिका– ९ मा एमाले विजयी
डोटी । डोटीको पूर्वीचौकी गाउँपालिकामा नेकपा एमाले विजयी भएको छ । एमालेका उम्मेदवार दीर्घ बोगटीले नेपाली काँग्रेसका उम्मेदवार रामप्रसाद उपाध्यायलाई झिनो मतले हराउनु भएको हो ।
बोगटीले तीन हजार ६१५ ल्याउँदा उनका निकटतम् प्रतिद्वन्द्वी नेपाली काँग्रेसका उम्मेदवार उपाध्यायले तीन हजार ५६८ मत ल्याउनुभएको थियो ।
उपाध्यक्षमा पनि एमालेकै निर्मला साउद विजयी हुनुभएको छ । साउद तीन हजार ५८७ मतका साथ विजयी हुनुभएको छ । उहाँको प्रतिद्वन्द्वी काँग्रेसकी माया कुँवरले तीन हजार ५२८ मत ल्याउनुभयो ।
सात वडामध्ये नेपाली काँग्रेसले चारवटा वडा जितेको छ । एमालेले तीनवटा वडामा जित निकालेको छ । १, २, ३ र ७ नम्बर वडामा काँग्रेस विजयी भएको छ । ४, ५ र ६ मा भने एमाले जितेको छ ।
लेटाङ नगरपालिका– ९ मा एमाले विजयी
मोरङको लेटाङ नगरपालिका – ९ मा नेकपा एमालेका वडा अध्यक्षसहित पूरै समूह विजयी भएको छ ।
अध्यक्षमा कृष्णप्रसाद लुइँटेल ८५२ मतप्राप्त गरी विजयी भएको निर्वाचन कार्यालय, विराटनगरले जनाएको छ ।
सोही वडाको महिला सदस्यमा कमला राई ८२६ मत, दलित महिलामा हरिमाया विश्वकर्मा ८३९ मत तथा खुल्ला सदस्यमा खेमराज ढकाल ८४४ मत र गोपालबहादुर मगर ८३१ मत प्राप्त गरी विजयी भएका हुन् ।
