कांग्रेस माओवादी निर्वाचनबाट भागे
नेकपा (एमाल)का वरिष्ठ नेता माधवकुमार नेपालले निर्वाचनदेखि डराएर नेपाली काँग्रेस र माओवादीले निर्वाचन सारेको वताउनुभएको छ । सुनसरीको धरानमा भएको चुनावी सभालाई सम्वोधन गर्दै नेता नेपालले भन्नुभयो,‘अहिलेको राजपा र पहिलेको मधेशी मोर्चा त वहाना मात्रै हो, चुनाव सारिनुको मुख्य कारण काँग्रेस र माओवादीको पराजित मानसकिता हो ।’ राजपा यथास्थितिमा निर्वाचनमा नआउने वताइरहेको र उसले नयाँ मितिका लागि आफ्नो सहमति नरहेको जनाएकाले पनि निर्वाचन सार्नुका पछाडि पराजयको डर बाहेक अरु कारण नभएको पूर्वप्रधानमन्त्री नेपालले वताउनुभयो । उहाँले भरतपुरको मतगणना प्रसंग जोड्दै पराजय हुन लागेपछि माओवादीका कार्यकर्ताले मतपत्र च्यातेको वताउनुभयो । कांग्रेसले देशको अर्थतन्त्र सखाप पारेको आरोप लगाउँदै नेता नेपालले भन्नुभयो,‘कांग्रेसको पेटको अपरेशन गर्नुस् त्यहाँ देशका धेरै उद्योग तथा कलकारखाना देख्नु हुनेछ ।’ धनगढीबाट सिधै धरानको चुनावी सभामा सहभागी हुन आउनुभएका नेता नेपालले धरानमा माओवादी पत्तासाप हुने आधार प्रस्तुत गर्नुभयो । ७९ हजार मतदाता रहेको धरानमा एमालेले धरानका चोकचोकबाट जुलुस निकालेको थियो । एमालेले धरानको भानुचोकमा भव्य सभा गर्योे ।
