महानगर शीर्ष नेताको कमाण्डमा

विराटनगर । विराटनगर महानगरपालिकाको जितहारलाई पार्टीकै प्रतिष्ठासँग जोडेर हेरिरहेका राजनीतिक दलले चुनावी कमान्डमा शीर्ष नेतारु नै खटिएका छन् । मिश्रित बसोवास रहेको र बलियो जनाधार नभएकाले चुनावमा प्रभाव पार्न दलहरूले शीर्ष नेतालाई चुनावी अखडामा उतारेका हुन् ।

संविधानसभाको दोस्रो निर्वाचनमा विराटनगर क्षेत्रमा पनि पर्ने मोरङका क्षेत्र नम्बर ५, ६ र ७ मा कांग्रेस विजयी भएको थियो । यही आधारमा नेपाली महानगरमा आफ्नो बलियो उपस्थिति रहेको दाबी गरे पनि चुनावी दौडाहामा चार केन्द्रीय नेतालाई खटाएको छ । कांग्रेसबाट मोरङको कमान्डर तोकिएका नेता विमलेन्द्र निधिले शुक्रबारदेखि चुनावी कमान्ड सम्हालिरहेका छन् । उनले शुक्रबार आधादर्जन चुनावी सभामा सहभागि भए । कांग्रेसकै नेता शेखर कोइराला, महेश आचार्य र मीनेन्द्र रिजाल सातादेखि नै विराटनगरका कांग्रेसी उम्मेदवारसँगै घरदैलोमा व्यस्त रहेका छन् ।

१ लाख १२ हजार ८ सय ३२ मतदाता रहेको विराटनगर महानगरमा कांग्रेस एक्लै चुनावी मैदानमा उत्रिएको छ । नेकपा एमाले र नेपाल लोकतान्त्रिक फोरम तथा संघीय समाजवादी फोरम र नेकपा माओवादी केन्द्रबीच भने मेयर र उपमेयरमा तालमेल भएको छ ।

कांग्रेसबाट मेयरमा भीम पराजुली र उपमेयरमा इन्दिरा कार्की उम्मेदवार छन्  भने  एमालेबाट मेयरमा विनोद ढकाल र उपमेयरमा नेपाल लोकतान्त्रिक फोरमकी सुची चौधरी उम्मेदवार बनेका छन् ।

नेपालको राजनीतिमा लामो इतिहास बोकेको र कोइराला परिवारको विरासतसँग गाँसिएको विराटनगर महानगरपालिका जित्ने दाउमा सबै दल छन् । शनिबार दुवै गठबन्धन एमाले–लोकतान्त्रिक फोरम र माओवादी केन्द्र–संघीय फोरमले शीर्ष नेताको उपस्थितिमा चुनावी सभा गर्दैछन् । एमाले–लोकतान्त्रिक फोरम गठबन्धनको सभामा एमाले अध्यक्ष केपी शर्मा ओली र लोकतान्त्रिक फोरमका अध्यक्ष विजयकुमार गच्छदार सहभागी हुँदैछन् ।

उम्मेदवार मनोनयनअघिदेखि विराटनगरमै रहेका लोकतान्त्रिक फोरमका अध्यक्ष गच्छदार बिहीबार काठमाडौं फर्किए पनि शनिबार बिहान फेरि विराटनगर आउने कार्यक्रम छ । गृह जिल्ला झापामा चुनावी अभियानमै सक्रिय एमाले अध्यक्ष ओली शनिबार मोरङ पस्दैछन् । एमाले मोरङका नेता ओसिम आलमका अनुसार ओली बिहान मोरङको उर्लाबारी र बेलबारीमा चुनावी सभामा सहभागी हुँदै अपराह्न विराटनगर आइपुग्नेछन् ।

‘हाम्रो गठबन्धनको विराटनगरमा आयोजना गरिएको चुनावी सभालाई ओलीले सम्बोधन गर्नेहुनेछ,’ नेता आलमले भने, ‘मतदातासित भेटघाट र कुराकानी पनि गर्नुहुनेछ ।’ मनोनयनअघिदेखि नै विराटनगरको कमान्ड एमाले नेता लालबाबु पण्डितले सम्हालिरहेका छन् । एमाले महासचिव ईश्वर पोखरेल बिहीबार र शुक्रबार उम्मेदवारसँग घरदैलोमा व्यस्त भए । अर्का नेता सुरेन्द्र पाण्डेले पनि मतदातासँग प्रत्यक्ष भेटघाट गरिरहेका छन् ।

दोस्रो संविधानसभाको निर्वाचनमा गच्छदार अध्यक्ष रहेको नेपाल लोकतान्त्रिक पार्टीले विराटनगर क्षेत्रमा दोस्रो बढी मत पाएको थियो । एमालेले त्यही मत तान्न पनि गच्छदारको पार्टीसँग तालमेल गरेको हो ।

संघीय समाजवादी फोरमका अध्यक्ष उपेन्द्र यादव पनि एक सातादेखि विराटनगरमै खटिरहेका छन् । गृहनगरमा पडक बलियो बनाउन नेता यादवले माओवादी केन्द्रसँग तालमेल गरेका हुन् । फोरमबाट मेयरमा उमेश यादव र उपमेयरमा माओवादी केन्द्रकी नमिता न्यौपाने उम्मेदवार छन् । शनिबारको चुनावी सभामा यादवसँगै माओवादी केन्द्रका अध्यक्ष पुष्पकमल दाहालको पनि सहभागिता रहने फोरम मोरङका अध्यक्ष राजकुमार यादवले जानकारी दिए ।