राजपाले मधेसीको अधिकार खोस्यो : खनाल
इलाम । नेकपा एमालेका वरिष्ठ नेता झलनाथ खनालले राजपाले चुनाव सारेर मधेसी जनताको नैसर्गिक अधिकार कुण्ठित गरेको बताएका छन् । मधेसी जनताको भावना विपरीत राजपाले निर्वाचनको मिति सार्न लगाएको आरोप नेता खनालले लगाएका छन्।
इलाम नगरपालिका ५ स्थित सुम्वेकमा बुधबार आयोजित चुनावी सभालाई सम्बोधन गर्दै नेता खनालले,“प्रदेश नं–२ का मधेसी जनताको भावना विपरीत राजपाले चुनावको मिति सार्न लगाएको हो । राजपाले मधेसी जनताको भावनामाथि खेलबाड गर्यो, जनताको निर्वाचनको अधिकार कुण्ठित गर्यो” भने ।
स्थानीय निर्वाचनपछि एमाले मुलुककै पहिलो पार्टी हुने बताउदै उनले एमालेको पहलमा संविधान जारी भएकाले लोकतन्त्रको सुदृढीकरण र आर्थिक समृद्धिका लागि पनि एमालेको नेतृत्व आवश्यक रहेको बताए।
वरिष्ठ नेता खनालले हत्या, हिंसा र आन्दोलनको युग समाप्त भएर अब मुलुक नयाँ चरणमा प्रवेश गरेको उल्लेख गर्दै आर्थिक समृद्धितर्फ अघि बढ्नुपर्नेमा जोड दिए ।
